కలం, వెబ్ డెస్క్ : కర్ణాటకలోని శివమొగ్గ జిల్లాలో కదులుతున్న ప్రైవేట్ స్లీపర్ బస్సులో (private sleeper bus) అకస్మాత్తుగా మంటలు చెలరేగాయి. సాగర్ తాలూకా పరిధిలోని ముంబళు గ్రామం సమీపంలో బస్సు వెళ్తుండగా ఈ ఘటన చోటుచేసుకుంది. బస్సులో మంటలు కనిపించడంతో ప్రయాణికుల్లో ఒక్కసారిగా ఆందోళన నెలకొంది.
మంటలను గమనించిన వెంటనే అప్రమత్తమైన ప్రయాణికులు ఏమాత్రం ఆలస్యం చేయకుండా బస్సు నుంచి బయటకు దిగారు. దీంతో ప్రాణనష్టం తప్పింది. ప్రయాణికులందరూ సురక్షితంగా బయటపడినట్లు సమాచారం. ఘటనతో కొద్దిసేపు బస్సు రాకపోకలకు అంతరాయం ఏర్పడినట్లు తెలుస్తోంది.
బస్సులో మంటలు చెలరేగిన విషయాన్ని స్థానికులు వెంటనే అగ్నిమాపక సిబ్బందికి తెలియజేశారు. సమాచారం అందుకున్న ఫైర్ సిబ్బంది హుటాహుటిన ఘటనాస్థలికి చేరుకున్నారు. మంటలు మరింతగా వ్యాపించకుండా చర్యలు చేపట్టి కొద్దిసేపటి ప్రయత్నం అనంతరం అదుపులోకి తీసుకువచ్చారు.
మంటలు ఏ కారణంగా చెలరేగాయనే విషయం ప్రాథమికంగా తెలియరాలేదు. బస్సులో విద్యుత్ లోపం లేదా ఇతర కారణాల వల్ల ప్రమాదం జరిగిందా అనే కోణంలో అధికారులు వివరాలు సేకరిస్తున్నారు. ఘటనపై పోలీసులు కూడా సమాచారం సేకరించినట్లు తెలుస్తోంది. ప్రయాణికులు సకాలంలో స్పందించి బస్సు నుంచి బయటకు రావడంతో పెద్ద ప్రమాదం తప్పింది. ఈ ఘటనతో బస్సు ప్రయాణికులు, స్థానికులు కొంతసేపు ఆందోళనకు గురయ్యారు.
