కలం, వెబ్డెస్క్: ఐపీఎల్ 2026 (IPL 2026) సీజన్లో ఢిల్లీ క్యాపిటల్స్ (Delhi Capitals) ఎట్టకేలకు ఊపిరి పీల్చుకుంది. ధర్మశాలలో మే 11న జరిగిన చావోరేవో పోరులో పంజాబ్ కింగ్స్ (Punjab Kings) పై 3 వికెట్ల తేడాతో థ్రిల్లింగ్ విక్టరీ కొట్టి, ప్లేఆఫ్ రేసులో నిలబడింది. కోల్కతా చేతిలో ఓటమి తర్వాత డీలా పడ్డ ఢిల్లీ, ఈ మ్యాచ్లో వ్యూహాత్మక మార్పులతో బరిలోకి దిగి సక్సెస్ అయింది. ప్రస్తుతం 12 మ్యాచ్ల్లో 5 విజయాలతో 10 పాయింట్లు సాధించిన అక్షర్ సేన, పాయింట్ల పట్టికలో ఏడో స్థానానికి చేరింది. ఈ నేపథ్యంలోనే ఢిల్లీ ప్లేఆఫ్స్ ఆశలు ఇంకా బతికే ఉన్నాయి. కానీ ప్లేఆఫ్స్కు చేరాలంటే ఢిల్లీ తీవ్రంగా కష్టపడమే కాకుండా, ఇతర జట్ల మ్యాచ్ల ఫలితాలను కూడా దగ్గరుండి పరిశీలించుకోవాలి.
ఢిల్లీ ప్లేఆఫ్స్కు చేరడం ఇప్పుడు పూర్తిగా వారి చేతుల్లో లేదు. ఢిల్లీ తన మిగిలిన రెండు మ్యాచ్లను భారీ రన్ రేట్తో గెలవడం అత్యంత ముఖ్యం. దీనివల్ల ఢిల్లీ గరిష్టంగా 14 పాయింట్లకు చేరుకుంటుంది. ఇప్పటికే బెంగళూరు, హైదరాబాద్, గుజరాత్ జట్లు 14 పాయింట్లతో టాప్-3లో ఉన్నాయి. కాబట్టి ఢిల్లీ టాప్-4లోకి రావాలంటే.. ప్రస్తుతం తమ పైన ఉన్న పంజాబ్, రాజస్థాన్, చెన్నై జట్లు తమ మిగిలిన మ్యాచ్ల్లో ఓడిపోవాలి. ముఖ్యంగా రాజస్థాన్, చెన్నై జట్లు తమ చివరి మూడు మ్యాచ్ల్లో కనీసం రెండింటిలో ఓడిపోతేనే ఢిల్లీకి అవకాశం ఉంటుంది.
ఢిల్లీకి మరో ఊరట ఏమిటంటే.. కోల్కతా నైట్ రైడర్స్ తమ మిగిలిన నాలుగు మ్యాచ్ల్లో కనీసం రెండింటిలో ఓడిపోవాలి. అలాగే ముంబై ఇండియన్స్, లక్నో సూపర్ జెయింట్స్ వంటి జట్లు రాజస్థాన్ లేదా చెన్నైని ఓడించడం ఢిల్లీకి కలసివచ్చే అంశం. ఢిల్లీ తన తర్వాతి మ్యాచ్లో రాజస్థాన్ను స్వయంగా ఎదుర్కోనుంది, ఆ మ్యాచ్ గెలవడం ఢిల్లీకి తప్పనిసరి. మొత్తానికి, అక్షర్ సేన అద్భుతాలు చేయడంతో పాటు, అదృష్టం కూడా తోడైతేనే ప్లేఆఫ్ బెర్త్ ఖాయమవుతుంది.
