కలం, వెబ్ డెస్క్: పోర్చుగల్ వరల్డ్ కప్ నుంచి నిష్క్రమించిన కొద్ది రోజుల్లోనే క్రిస్టియానో రొనాల్డో (Cristiano Ronaldo) చేసిన సోషల్ మీడియా పోస్ట్ చర్చగా మారింది. అదే సమయంలో అభిమానుల నుంచి ట్రోల్స్ కూడా వెల్లువెత్తాయి. యూఈఎఫ్ఏ యూరో-2016 టైటిల్ గెలిచి పదేళ్లు పూర్తైన సందర్భంగా రొనాల్డో “మిలియన్ల విజయాల్లో ఒకటి” అంటూ పోస్టు చేశాడు. ఆ విజయాన్ని గుర్తు చేసుకున్నాడు. అయితే వరల్డ్ కప్ నుంచి తాజాగా నిష్క్రమించిన వెంటనే ఆ పోస్టు రావడం చాలామందికి నచ్చలేదు. కొందరు రొనాల్డో గత విజయాల్లోనే జీవిస్తున్నాడంటూ విమర్శించారు.
స్పెయిన్ చేతిలో పోర్చుగల్ ఓడిన తర్వాత కూడా రొనాల్డో యూరో ఛాంపియన్షిప్ తనకు వరల్డ్ కప్తో సమానమని చెప్పాడు. పోర్చుగల్ తరఫున తాను మూడు టైటిళ్లు గెలిచానని, తనకంటే ముందు జట్టు ఒక్క టైటిల్ కూడా గెలవలేదని గుర్తు చేశాడు. 2016 యూరో టైటిల్ దేశ చరిత్రలోనే గొప్ప విజయమని పేర్కొన్నాడు. పోర్చుగల్ తరఫున అత్యధిక మ్యాచ్లు ఆడిన ఆటగాడిగానూ, అత్యధిక గోల్స్ చేసిన ఆటగాడిగానూ రొనాల్డో కొనసాగుతున్నాడు.
యూరో-2016తో పాటు తొలి యూఈఎఫ్ఏ నేషన్స్ లీగ్ టైటిల్ను కూడా జట్టుకు అందించాడు. ఈసారి వరల్డ్ కప్లో టైటిల్ ఫేవరెట్గా బరిలోకి దిగిన పోర్చుగల్.. ప్రీక్వార్టర్స్లోనే నిష్క్రమించింది. స్పెయిన్పై ఓటమితో రొనాల్డో వరల్డ్ కప్ ప్రయాణం ముగిసింది. ఇదే తన చివరి ఫిఫా వరల్డ్ కప్ అని రొనాల్డో ముందే ప్రకటించాడు. చివరి మ్యాచ్ తర్వాత కన్నీటి కళ్లతో మైదానం వీడిన రొనాల్డోకు, ప్రపంచకప్ వేదికపై అదే చివరి అధ్యాయంగా నిలిచింది.
