ఇటీవల జూబ్లీహిల్స్ ఉప ఎన్నికల్లో విజయం సాధించి ఊపుతో ఉన్న కాంగ్రెస్ పార్టీ తాజాగా గ్రామ పంచాయతీ ఎన్నికలకు సిద్ధమైంది. ఎట్టి పరిస్థితుల్లోనూ గ్రామాల్లో తమ మద్దతుదారులను గెలిపించుకోవాలని చూస్తున్నది. ఇందుకోసం నేరుగా ముఖ్యమంత్రి రేవంత్ రెడ్డి(Revanth Reddy), మంత్రులు, ఎమ్మెల్యేలు, ఎమ్మెల్సీలు, కార్పొరేషన్ చైర్మన్లు రంగంలోకి దిగబోతున్నారు. రాష్ట్రవ్యాప్తంగా వివిధ ప్రాంతాల్లో పర్యటించి కాంగ్రెస్ పార్టీకి ఊపు తీసుకొచ్చే ప్రయత్నం చేయబోతున్నారు. ప్రభుత్వం అందిస్తున్న సంక్షేమ పథకాలే తమను గెలిపిస్తాయని కాంగ్రెస్ నేతలు భావిస్తున్నారు. ప్రస్తుతం గ్రామీణ ప్రాంతాల్లో ఇందిరమ్మ ఇండ్లు నిర్మాణ దశలో ఉండటం, మరికొన్ని సంక్షేమ పథకాలు అమల్లో ఉండటం తమకు కలిసివస్తుందని ఆ పార్టీ వర్గాలు భావిస్తున్నాయి. అయితే ఇంకా కొన్ని హామీలను పూర్తి స్థాయిలో నెరవేర్చలేదు. దీంతో కొంత వ్యతిరేకత కూడా వచ్చే అవకాశం ఉంది. అయితే సమన్వయంతో పనిచేసి మెజార్టీ పంచాయతీలను గెలచుకోవాలని కాంగ్రెస్ పార్టీ భావిస్తోంది.
ఈ నేపథ్యంలో సీఎం రేవంత్ రెడ్డి డిసెంబర్ 1 నుంచి జిల్లాల్లో పర్యటించనున్నారు. ముఖ్యమంత్రి రేవంత్ రెడ్డి(Revanth Reddy) జిల్లాల్లో పర్యటించి ప్రభుత్వ పథకాల అమలు, అభివృద్ధి పనుల పురోగతిని సమీక్షించడం, ప్రజల సమస్యలను ప్రత్యక్షంగా తెలుసుకోవడం, పార్టీ శ్రేణులకు దిశానిర్దేశం చేయడం ముఖ్య ఉద్దేశ్యాలుగా ప్రభుత్వం ప్రకటించింది. జిల్లా ప్రధాన కేంద్రాలలో జరిగే సభల్లో సీఎం ప్రభుత్వం చేపట్టిన ఇందిరమ్మ ఇండ్లు, గృహలక్ష్మి, రైతు సంక్షేమ చర్యలు, విద్య–ఆరోగ్య రంగాలలో జరుగుతున్న మార్పులు, గ్రామీణ అభివృద్ధి కార్యక్రమాల్ని ప్రజలకు వివరించనున్నారు. ప్రతి జిల్లాకు రోజుకు రెండు, మూడు సమావేశాలు నిర్వహించే అవకాశముంది.
సర్పంచ్ ఎన్నికలపై కాంగ్రెస్ దృష్టి
సర్పంచ్ ఎన్నికలను ప్రభుత్వం అత్యంత కీలకంగా చూస్తోంది. గ్రామ స్థాయిలో పార్టీ బలం పెంచుకోవడమే కాకుండా, గ్రామాల్లో కాంగ్రెస్‌కు ఉన్న ప్రజాభిమానాన్ని మరింతగా స్థిరపరిచేందుకు ప్రత్యేక వ్యూహాన్ని పార్టీ రూపొందించింది. అయితే బీసీ రిజర్వేషన్ అమలు చేసి తీరుతామని కాంగ్రెస్ పార్టీ చెప్పినప్పటికీ న్యాయపరమైన చిక్కులతో రిజర్వేషన్లు అమలు కాలేదు. ఈ అంశం కొంత వ్యతిరేకత తీసుకొచ్చే అవకాశం ఉంది. బలమైన స్థానిక నేతలను ముందుకు తేవాలనే దిశగా హైకమాండ్ పని చేస్తోంది.
ప్రతి గ్రామంలో బూత్ స్థాయిలో ప్రచార కమిటీలను ఏర్పాటు చేసి, ఓటర్లతో నేరుగా సంప్రదింపులు జరిపేలా చర్యలు చేపడుతోంది. ఇటీవల జరిగిన జూబ్లీహిల్స్ ఉప ఎన్నికలో కాంగ్రెస్ పార్టీకి పోల్ మేనేజ్ మెంట్ కలిసివచ్చింది. అధికారయంత్రాంగం కూడా కొంతమేర ప్రభుత్వానికి అనుకూలంగా వ్యవహరించిందని చెబుతున్నారు. ఇప్పుడు గ్రామీణ ప్రాంతాల్లో కూడా అదే వ్యూహాన్ని అవలంభించాలని కాంగ్రెస్ పార్టీ వ్యూహం రచిస్తున్నట్టు తెలుస్తోంది. ఎంపీపీ వంటి పదవులకు పోటీ పడే వారికి, ఎంపీటీసీ, జెడ్పీటీసీ టికెట్ ఆశించేవారికి కొన్ని కీలక బాధ్యతలు అప్పగించబోతున్నట్టు సమాచారం.
గత రెండేళ్లలో కాంగ్రెస్ ప్రభుత్వం అమలు చేసిన ముఖ్య పథకాలే ఈసారి ప్రధాన ప్రచార ఆయుధాలు. ఇందిరమ్మ ఇళ్ల హామీ, ఉచిత బస్ ప్రయాణం, గృహలక్ష్మి పురోగతిపై ప్రత్యేకంగా దృష్టి పెట్టాలని కాంగ్రెస్ నిర్ణయించింది. మరి కాంగ్రెస్ పార్టీ వ్యూహం ఫలిస్తుందా? ప్రభుత్వ వ్యతిరేకత మాట ఏమిటి? ప్రతిపక్షాలు ఎటువంటి వ్యూహంతో ముందుకెళ్తాయి? అన్నది వేచి చూడాలి.
Read Also: యాంకర్ శివజ్యోతిపై జీవిత కాల నిషేధం
Follow Us on : Pinterest
