కలం, రాజన్న సిరిసిల్ల: తెలంగాణ రాష్ట్ర అభివృద్ధి, పెట్టుబడుల ఆకర్షణ పేరుతో నిర్వహిస్తున్న భారత్ సమ్మిట్‌కు భారతదేశాన్ని వ్యతిరేకించే శక్తులను ఆహ్వానించడం కాంగ్రెస్ ప్రభుత్వ వైఖరిని తెలియజేస్తోందని బీజేపీ రాజన్న సిరిసిల్ల జిల్లా అధ్యక్షులు రెడ్డబోయిన గోపి (Reddaboina Gopi) విమర్శించారు. నేడు రాజన్న సిరిసిల్ల జిల్లా కేంద్రంలోని అంబేద్కర్ చౌరస్తా వద్ద భారతీయ జనతా పార్టీ రాజన్న సిరిసిల్ల జిల్లా శాఖ ఆధ్వర్యంలో కాంగ్రెస్ ప్రభుత్వ వైఖరికి నిరసనగా నల్ల జెండాలతో ఆందోళన నిర్వహించారు. అనంతరం కాంగ్రెస్ పార్టీ దిష్టిబొమ్మను దహనం చేసి నిరసన వ్యక్తం చేశారు. ఈ కార్యక్రమానికి బీజేపీ జిల్లా అధ్యక్షులు రెడ్డబోయిన గోపి అధ్యక్షత వహించారు.
ఈ సందర్భంగా రెడ్డబోయిన గోపి పాత్రికేయులతో మాట్లాడుతూ.. ముఖ్యమంత్రి రేవంత్ రెడ్డి తెలంగాణ రాష్ట్రానికి పెట్టుబడులు తీసుకురావడం, అభివృద్ధి సాధించడం లక్ష్యంగా భారత్ సమ్మిట్ నిర్వహిస్తున్నామని చెబుతున్నారని, గతంలో నిర్వహించిన గ్లోబల్ సమ్మిట్ ద్వారా రాష్ట్రానికి ఎన్ని పెట్టుబడులు వచ్చాయి? ఎన్ని పరిశ్రమలు ఏర్పాటయ్యాయి? ఎంతమందికి ఉపాధి లభించిందో ప్రజలకు స్పష్టంగా వివరించాలని డిమాండ్ చేశారు. అయితే భారత్ సమ్మిట్ పేరుతో విదేశాల నుంచి భారతదేశాన్ని వ్యతిరేకించే, దేశ సమగ్రతను ప్రశ్నించే శక్తులకు ఆహ్వానాలు పలకడం ఏమిటని ప్రశ్నించారు. ముఖ్యమంత్రి రేవంత్ రెడ్డి ఈ కార్యక్రమానికి ఏర్పాట్లు చేయడం, కాంగ్రెస్ అగ్రనేత రాహుల్ గాంధీ దీనికి మద్దతు తెలపడం వెనుక ఉన్న ఉద్దేశాన్ని ప్రజలకు వివరించాలని అన్నారు. భారతదేశ ప్రతిష్ఠను దెబ్బతీసే వ్యక్తులకు అంతర్జాతీయ వేదిక కల్పించడం ఎంతవరకు సమంజసమని నిలదీశారు.
రాష్ట్ర అభివృద్ధికి, పెట్టుబడుల రాకకు, పరిశ్రమల ఏర్పాటుకు బీజేపీ ఎప్పుడూ వ్యతిరేకం కాదని స్పష్టం చేశారు. పెట్టుబడులు పెట్టే కంపెనీలను, పారిశ్రామికవేత్తలను ఆహ్వానించి సమ్మిట్‌లు నిర్వహిస్తే స్వాగతిస్తామని, కానీ అభివృద్ధి పేరుతో భారతదేశ గౌరవాన్ని కించపరిచే శక్తులకు ప్రాధాన్యత కల్పించడాన్ని మాత్రం సహించేది లేదని హెచ్చరించారు.
ప్రపంచ దేశాల్లో భారతదేశం తనకంటూ ప్రత్యేక గుర్తింపు సంపాదించుకుని అన్ని రంగాల్లో ముందుకు సాగుతున్న తరుణంలో దేశ ఔన్నత్యానికి భంగం కలిగించే విధంగా కాంగ్రెస్ పార్టీ వ్యవహరించడం సరికాదన్నారు. తెలంగాణ అభివృద్ధి జరగాలి, పెట్టుబడులు రావాలి, యువతకు ఉపాధి అవకాశాలు కలగాలని కోరిన ఆయన… అదే సమయంలో భారతదేశ గౌరవం, ప్రతిష్ఠకు భంగం కలగకుండా రాష్ట్ర ప్రభుత్వం బాధ్యతాయుతంగా వ్యవహరించాలని డిమాండ్ చేశారు.
బీజేపీ రాష్ట్ర ఎస్సీ మోర్చా కార్యదర్శి సంటి మహేష్, పార్లమెంట్ కో-కన్వీనర్ ఆడెపు రవీందర్, జిల్లా ప్రధాన కార్యదర్శులు పొన్నాల తిరుపతిరెడ్డి, సిరికొండ శ్రీనివాస్, జిల్లా ఉపాధ్యక్షులు శీలం రాజు, ఎస్సీ మోర్చా జిల్లా అధ్యక్షులు ఉడుగుల యాదగిరి, కిసాన్ మోర్చా జిల్లా అధ్యక్షులు అన్నాడి జలపతి రెడ్డి, ఎస్టీ మోర్చా జిల్లా అధ్యక్షులు కిరణ్ నాయక్, మైనారిటీ మోర్చా జిల్లా అధ్యక్షులు షేక్ సాబీర్, జిల్లా ధార్మిక సెల్ కన్వీనర్ డాక్టర్ సత్యనారాయణ ,సిరిసిల్ల పట్టణ అధ్యక్షులు దుమాల శ్రీకాంత్, ముస్తాబాద్ మండల అధ్యక్షులు సౌల్ల క్రాంతి, గంభీరావుపేట మండల అధ్యక్షులు కోడె రమేష్, వీర్నపల్లి మండల అధ్యక్షులు లకుపతి నాయక్, చందుర్తి మండల అధ్యక్షులు మోకిలే విజయేందర్, కొనరావుపేట మండల అధ్యక్షులు మీరాల్కర్ బాలాజీ, తంగళ్ళపల్లి మండల అధ్యక్షులు వెన్నమనేని శ్రీధర్ రావుతో పాటు బీజేపీ రాష్ట్ర, జిల్లా, వివిధ మోర్చాల, మండల పదాధికారులు, మున్సిపల్ కౌన్సిలర్లు, సర్పంచులు, యువమోర్చా నాయకులు, కార్యకర్తలు పెద్ద సంఖ్యలో ఈ కార్యక్రమంలో పాల్గొన్నారు.
