కలం, స్పోర్ట్స్ : ఇంగ్లండ్ మాజీ కెప్టెన్ బెన్ స్టోక్స్ (Ben Stokes) మరోసారి వార్తల్లో నిలిచారు. ఆయన రిటైర్మెంట్కు సంబంధించిన వీడియోపై ఐసీసీ ఇంగ్లండ్ అండ్ వేల్స్ క్రికెట్ బోర్డు (ECB)ను పరిశీలిస్తున్నట్లు వార్తలు రావడంతో, స్టోక్స్ చేసిన రెండు పదాల సోషల్ మీడియా పోస్ట్ ఇప్పుడు చర్చకు దారి తీసింది. ట్రెంట్ బ్రిడ్జ్ టెస్టులో న్యూజిలాండ్తో మ్యాచ్ జరుగుతున్న సమయంలో బెన్ స్టోక్స్ అంతర్జాతీయ క్రికెట్కు వీడ్కోలు ప్రకటించారు. ఆ ప్రకటనకు సంబంధించిన వార్తను సోషల్ మీడియాలో షేర్ చేసిన ఆయన, దానికి “Sack him…” అనే రెండు పదాలు మాత్రమే జత చేశారు.
ఈ చిన్న పోస్ట్ క్షణాల్లో వైరల్ అయింది. దీంతో స్టోక్స్ రిటైర్మెంట్ పూర్తిగా ఆయన వ్యక్తిగత నిర్ణయమేనా, లేక దాని వెనుక మరేదైనా కారణాలు ఉన్నాయా అనే చర్చ అభిమానుల్లో మళ్లీ మొదలైంది. ఈ వివాదానికి కారణమైనది డ్రెస్సింగ్ రూమ్లో చిత్రీకరించిన ఒక వీడియో. ట్రెంట్ బ్రిడ్జ్ టెస్టు నాలుగో రోజు ఆట ప్రారంభానికి ముందు స్టోక్స్ తన సహచర ఆటగాళ్లకు రిటైర్మెంట్ గురించి చెప్పిన దృశ్యాలను ఈసీబీ రికార్డ్ చేసింది. అనంతరం మ్యాచ్ కొనసాగుతుండగానే టీ విరామానికి ముందు ఆ వీడియోను సోషల్ మీడియాతో పాటు ప్రసార సంస్థలకు విడుదల చేసింది.
ఈ వీడియోపై ఐసీసీ అభ్యంతరం వ్యక్తం చేసినట్లు బీబీసీ వెల్లడించింది. మ్యాచ్ జరుగుతున్న సమయంలో డ్రెస్సింగ్ రూమ్లో రికార్డ్ చేసిన వీడియోను, ముఖ్యంగా ఆడియోతో సహా విడుదల చేయడం నిబంధనలకు విరుద్ధంగా ఉండొచ్చని ఐసీసీ ఈసీబీకి లేఖ పంపినట్లు ఆ నివేదిక తెలిపింది. ఐసీసీ నిబంధనల ప్రకారం డ్రెస్సింగ్ రూమ్ వంటి ఆటగాళ్ల ప్రాంతాల్లో ప్రసారాల కోసం రికార్డింగ్ పరికరాలు ఉండకూడదు.
అలాగే అక్కడ రికార్డ్ చేసిన వీడియోలను ఆడియోతో మ్యాచ్ ముగిసేలోపు విడుదల చేయకూడదని కూడా నిబంధనలు పేర్కొంటున్నాయి. ఈ నిబంధనలు ఆటలో పారదర్శకత, అవినీతి నిరోధక చర్యలకు మద్దతుగా రూపొందించబడ్డాయి. అయితే ఈ అంశంపై ఇప్పటివరకు ఈసీబీ గానీ, ఐసీసీ గానీ అధికారికంగా ఎలాంటి వ్యాఖ్య చేయలేదు. మరోవైపు, స్టోక్స్ చేసిన “Sack him…” పోస్ట్కు కూడా ఆయన (Ben Stokes) ఎలాంటి వివరణ ఇవ్వలేదు.
కొందరు అభిమానులు దాన్ని సరదా వ్యాఖ్యగా భావిస్తుండగా, మరికొందరు ఆయన రిటైర్మెంట్ వెనుక పరిస్థితులపై మరోసారి చర్చ మొదలయ్యేలా చేసిందని అభిప్రాయపడుతున్నారు. రిటైర్మెంట్ ప్రకటించిన సమయంలో ఆ నిర్ణయాన్ని తన మేనేజ్మెంట్ బృందం, ఈసీబీతో కలిసి తీసుకున్నట్లు స్టోక్స్ తెలిపారు. ఆ ప్రకటన తర్వాత తన తదుపరి బంతికే న్యూజిలాండ్ బ్యాటర్ జాక్ ఫౌల్క్స్ను ఔట్ చేసిన ఆయన, మరుసటి రోజుతో తన అంతర్జాతీయ కెరీర్కు ముగింపు పలికారు.
