పంచాయతీ ఎన్నికల షెడ్యూల్ రావడంతో బీసీ సంఘాలు(BC Organisations) ఆందోళన బాట పట్టాయి. గతంలో ప్రభుత్వం బీసీలకు 42 శాతం రిజర్వేషన్లు ఇస్తామని ప్రకటించింది. అయితే అసెంబ్లీలో బిల్లు ఆమోదించినప్పటికీ.. ఆ బిల్లు కార్యరూపం దాల్చలేదు. న్యాయపరమైన చిక్కులు ఉన్నాయి. దీంతో ప్రభుత్వం పాత పద్ధతిలోనే రిజర్వేషన్లతో ఎన్నికలకు వెళ్లాల్సి వచ్చింది. అయితే బీసీ సంఘాలు ప్రభుత్వం మీద ఆగ్రహం వ్యక్తం చేస్తున్నాయి. హైదరాబాద్‌లోని గాంధీ భవన్(Gandhi Bhavan)ను తాజాగా బీసీ సంఘాలు ముట్టడించాయి. ప్రభుత్వం జారీ చేసిన జీవో నెంబర్ 46 బీసీలను నష్టపరిచే విధంగా ఉందని, వెంటనే దీనిని రద్దు చేయాలని నాయకులు డిమాండ్ చేశారు. పంచాయతీ ఎన్నికల షెడ్యూల్‌ను కూడా రద్దు చేసి, కొత్త రిజర్వేషన్ విధానంతో మళ్లీ నోటిఫికేషన్ ఇవ్వాలని అగ్రహం వ్యక్తం చేస్తున్నారు.
బీసీ సంఘాల డిమాండ్లు ఇవే..
పంచాయతీ ఎన్నికల రిజర్వేషన్లలో బీసీల వాటా భారీగా తగ్గించారని బీసీ సంఘాలు చెబుతున్నాయి. పలు జిల్లాల్లో బీసీల వాస్తవ జనాభా 40% పైగా ఉన్నా, రిజర్వేషన్ మాత్రం 10–12% కు పరిమితం చేశారు. వర్గాల వారీగా బీసీలకు న్యాయం జరగలేదని, రిజర్వేషన్ పంపిణీ పూర్తిగా అసమతుల్యంగా ఉందని ఆరోపిస్తున్నారు. “బీసీలను లెక్కల్లో, గణాంకాల్లో తగ్గించి చూపించారు. రిజర్వేషన్లను తమ ఇష్టానుసారం కుదించారు. ఇది బీసీ వర్గాల రాజకీయ హక్కులపై దాడి” అని మండిపడ్డారు.
జీవో 46పై వివాదం
జీవో నెంబర్ 46లో గ్రామ పంచాయతీల రిజర్వేషన్ పంపిణీ, వర్గీకరణ విధానం బీసీలకు అన్యాయం జరిగేలా ఉందని బీసీ సంఘాలు(BC Organisations) ఆరోపిస్తున్నాయి. రిజర్వేషన్ల గణాంకాలు పారదర్శకంగా లేవని చెబుతున్నారు. ఈ జీవో వల్ల వేలాది బీసీ అభ్యర్థులు ఎన్నికల పోటీలో అవకాశం కోల్పోతారని సంఘాలు చెబుతున్నాయి. సోమవారం పంచాయతీ ఎన్నికల షెడ్యూల్ విడుదలైన వెంటనే బీసీ సంఘాల అసంతృప్తి తారాస్థాయికి చేరింది.
Read Also: సర్పంచ్ రిజర్వేషన్లపై బీసీ సంఘాల ఆగ్రహం
Follow Us on : Pinterest
