కలం, స్పోర్ట్స్ : 23 ఏళ్ల తర్వాత ఆస్ట్రేలియా గడ్డపై టెస్టు సిరీస్ ఆడేందుకు బంగ్లాదేశ్ సిద్ధమైంది. స్టార్ పేసర్ నహీద్ రానా లేకపోయినా.. తమ బౌలింగ్తో గట్టి పోటీ ఇస్తామని కెప్టెన్ నజ్ముల్ హొసైన్ శాంటో (Shanto) విశ్వాసం వ్యక్తం చేశాడు. ఆగస్టు 13న డార్విన్లో తొలి టెస్టు ప్రారంభం కానుంది. రెండో టెస్టు మకాయ్లో జరగనుంది. నహీద్ రానా గాయం జట్టుకు ఎదురుదెబ్బేనని శాంటో అంగీకరించాడు. అయితే దాని గురించి ఆలోచించి ప్రయోజనం లేదని చెప్పాడు. ప్రస్తుత జట్టుపైనే తనకు పూర్తి నమ్మకం ఉందని వివరించాడు.
ఆస్ట్రేలియా పరిస్థితుల్లో 20 వికెట్లు తీయగల బౌలర్లు తమ వద్ద ఉన్నారని శాంటో తెలిపాడు. ఇద్దరు అనుభవజ్ఞులైన స్పిన్నర్లు, బలమైన పేస్ దాడి జట్టుకు బలమని పేర్కొన్నాడు. ముష్ఫిక్ హసన్ మినహా మిగతా పేసర్లు అందరూ అనుభవం ఉన్నవారేనని చెప్పాడు. 23 ఏళ్ల తర్వాత ఆస్ట్రేలియాలో టెస్టు ఆడే అవకాశం రావడం అదృష్టంగా భావిస్తున్నామని శాంటో వెల్లడించాడు. గతంలో మరిన్ని టెస్టులు అక్కడ ఆడాల్సి ఉండేదని అభిప్రాయపడ్డాడు.
ఈ పర్యటనలో మంచి క్రికెట్ ఆడాలని, గెలుపు కోసం పోరాడాలని లక్ష్యంగా పెట్టుకున్నామని తెలిపాడు. ఆస్ట్రేలియాలో మళ్లీ టెస్టు అవకాశాలు రావాలంటే ఈ సిరీస్లో తమ ప్రదర్శన కీలకమని పేర్కొన్నాడు. ఈ సిరీస్కు ఆస్ట్రేలియా పూర్తి బలమైన జట్టును ప్రకటించడాన్ని కూడా శాంటో స్వాగతించాడు. తమ జట్టును తేలికగా తీసుకోవడం లేదని, ఇటీవలి ప్రదర్శనలతో బంగ్లాదేశ్ గౌరవం సంపాదించిందని చెప్పాడు.
