కలం, వెబ్ డెస్క్: ఎయిర్ ఇండియా (Air India) విమానానికి ప్రమాదం తప్పింది. హైదరాబాద్ నుంచి థాయిలాండ్లోని ఫుకెట్కు బయలుదేరిన ఎయిరిండియా ఎక్స్ప్రెస్ విమానం ల్యాండింగ్ సమయంలో ఇబ్బంది ఎదుర్కొన్నది. పైలట్ల అప్రమత్తంగా వ్యవహరించడంతో ప్రయాణికులు ఊపిరిపీల్చుకున్నారు. ల్యాండింగ్ సమయంలో విమానంలోని ముందు ల్యాండింగ్ గేర్ దెబ్బతిని విమానం రన్వేపై గట్టిగా ల్యాండ్ అయిందని అధికారులు చెబుతున్నారు. ఆ సమయంలో విమానంలో 133 మంది ప్రయాణికులు ఉన్నారు. ఎయిరిండియా ఎక్స్ప్రెస్ విమానం IX-938 విమానం బుధవారం ఉదయం 6.40 గంటల సమయంలో హైదరాబాద్ నుంచి థాయిలాండ్లోని ఫుకెట్ అంతర్జాతీయ విమానాశ్రయానికి బయలుదేరింది. ఇది బోయింగ్ 737 మ్యాక్స్-8 విమానం. స్థానిక కాలమానం ప్రకారం సుమారు ఉదయం 11.30–11.40 గంటల మధ్య ఫుకెట్ విమానాశ్రయంలో ల్యాండ్ అయింది. విమానాన్ని రన్వేపై దింపుతున్న సమయంలో ముందు భాగంలోని నోస్ ల్యాండింగ్ గేర్లో సమస్య తలెత్తింది. ల్యాండింగ్ సమయంలో అది దెబ్బతినడంతో విమానం రన్వేపై తాకింది. కొంత దూరం రన్వేపై స్లైడ్ అవుతూ వెళ్లిన తర్వాత విమానం ఆగిపోయింది. ఈ ఘటనతో విమానాశ్రయంలో కొంతసేపు ఉద్రిక్త పరిస్థితి నెలకొంది. ప్రయాణికుల్లో కొందరు భయాందోళనలకు గురయ్యారు.
ప్రయాణికులు సేఫ్
ఎయిర్ ఇండియా (Air India) విమానం ఆగిన వెంటనే భద్రతా సిబ్బంది విమానాశ్రయ అధికారులు ఘటనాస్థలికి చేరుకున్నారు. అత్యవసర విధానాల ప్రకారం విమానంలోని ప్రయాణికులను ఒక్కొక్కరిని సురక్షితంగా బయటకు తీసుకువచ్చారు. మొత్తం 133 మంది ప్రయాణికులు, సిబ్బంది ఎవరూ గాయపడలేదని అధికారులు తెలిపారు. ఎయిరిండియా ఎక్స్ప్రెస్ సంస్థ కూడా ఈ ఘటనను ధృవీకరించింది. ఫుకెట్ విమానాశ్రయంలో ల్యాండింగ్ సమయంలో విమానం నోస్ వీల్లో సాంకేతిక సమస్య తలెత్తిందని తెలిపింది. పైలట్లు అన్ని భద్రతా విధానాలను పాటించి ప్రయాణికులను సురక్షితంగా బయటకు తీసుకువచ్చారని సంస్థ వెల్లడించింది. ఈ ఘటన కారణంగా ఫుకెట్ అంతర్జాతీయ విమానాశ్రయంలో కొంతసేపు విమాన రాకపోకలు నిలిపివేశారు. విమానం రన్వేపై నిలిచిపోవడంతో అక్కడి అధికారులు రన్వేను తాత్కాలికంగా మూసివేశారు. సుమారు ఐదు నుంచి ఆరు గంటల పాటు రన్వేను మూసివేసి భద్రతా తనిఖీలు నిర్వహించారు. విమానాన్ని రన్వే నుంచి తొలగించిన తర్వాత మరియు పరిస్థితి సురక్షితంగా ఉందని నిర్ధారించిన తర్వాత విమానాశ్రయ కార్యకలాపాలను మళ్లీ ప్రారంభించారు.
ఘటనపై దర్యాప్తు
ల్యాండింగ్ సమయంలో ల్యాండింగ్ గేర్ ఎందుకు దెబ్బతిన్నదనే అంశంపై అధికారులు దర్యాప్తు ప్రారంభించారు. విమానం ల్యాండింగ్ సమయంలో గట్టిగా తాకడం (హార్డ్ ల్యాండింగ్) కారణంగా ఈ సమస్య తలెత్తి ఉండవచ్చని ప్రాథమికంగా భావిస్తున్నారు. విమానయాన భద్రతా అధికారులు, సాంకేతిక నిపుణులు ఘటనపై పూర్తి నివేదిక సిద్ధం చేయనున్నారు. ఈ ఘటనలో విమానం ల్యాండింగ్ గేర్ దెబ్బతిన్నప్పటికీ ప్రయాణికులకు ఎలాంటి ప్రమాదం జరగకపోవడం పెద్ద ఊరట కలిగించింది. పైలట్ల సమయోచిత చర్యల వల్లే పెను ప్రమాదం తప్పిందని విమానయాన నిపుణులు పేర్కొంటున్నారు. హైదరాబాద్ నుంచి విదేశాలకు వెళ్లే విమానాల్లో ఇది ఇటీవల కాలంలో జరిగిన ప్రధాన సంఘటనగా భావిస్తున్నారు. అయితే అందరూ సురక్షితంగా బయటపడటం పెద్ద ప్రమాదం తప్పిన ఘటనగా భావిస్తున్నారు.
