కలం, ఖమ్మం బ్యూరో: ఖమ్మం (Khammam) నగరంలోని బైపాస్ రోడ్డు ఎన్టీఆర్ సర్కిల్ సమీపంలో శనివారం ఉదయం భారీ ప్రమాదం చోటు చేసుకుంది. హైదరాబాద్ నుండి మిథైల్ కెమికల్తో వెళ్తున్న ఒక రవాణా ట్యాంకర్, ఇల్లందు రోడ్డు వైపు ఉన్న మూలమలుపు వద్ద యూ-టర్న్ తీసుకునే క్రమంలో అదుపుతప్పి డివైడర్ను బలంగా ఢీకొట్టింది. ఈ ప్రమాద తీవ్రతకు ట్యాంకర్ డీజిల్ బాక్స్ పూర్తిగా పగిలిపోయింది. దీంతో లీకైన డీజిల్ అంతా రహదారిపై భారీగా ప్రవహించింది. స్థానికులు సమాచారం అందించడంతో అగ్నిమాపక సిబ్బంది హుటాహుటిన ఘటనా స్థలానికి చేరుకున్నారు. రోడ్డుపై ప్రవహిస్తున్న డీజిల్ కారణంగా ఎలాంటి అగ్నిప్రమాదం జరగకుండా సిబ్బంది తక్షణమే స్పందించి, డీజిల్ అంతటా రసాయన ఫోమ్ చల్లారు.
ప్రమాదం జరిగిన ప్రాంతానికి అతి సమీపంలోనే పెట్రోల్ బంక్ ఉండటంతో స్థానిక ప్రజలు, వాహనదారులు తీవ్ర భయాందోళనలకు గురయ్యారు. అయితే, ఫైర్ సిబ్బంది సకాలంలో స్పందించి రక్షణ చర్యలు చేపట్టడంతో ఒక పెద్ద ముప్పు తప్పినట్లయింది. ఈ ప్రమాదం కారణంగా ఖమ్మం (Khammam) బైపాస్ రోడ్డుపై వాహనాల రాకపోకలకు తీవ్ర అంతరాయం ఏర్పడి, ట్రాఫిక్ భారీగా స్తంభించింది. సమాచారం అందుకున్న స్థానిక పోలీసులు సంఘటనా స్థలానికి చేరుకుని పరిస్థితిని సమీక్షించారు. అనంతరం భారీ క్రేన్ సహాయంతో ప్రమాదానికి గురైన ట్యాంకర్ను రహదారి పక్కకు తొలగించి, ట్రాఫిక్ను క్రమబద్ధీకరిస్తూ రద్దీని పునరుద్ధరించారు.
Read Also: ‘గుంపు మేస్త్రీ హఠావో.. తెలంగాణ బచావో’: కవిత సంచలన నినాదం!
Follow Us On: Instagram
