ములుగు(Mulugu) జిల్లా వెంకటాపురం మండలం అబ్బాయిగూడెంలో ఇసుక మాఫియాపై జనం తిరగబడ్డారు. ఇసుకమాఫియా ఆగడాలకు వ్యతిరేకంగా శుశ్రవారం ప్రజలు రోడ్డెక్కారు. మంత్రి సీతక్క జిల్లాలో ఇసుక మాఫియాకు వ్యతిరేకంగా జనం తిరగబడటం గమనార్హం. నిత్యం గ్రామ పరిసరాల్లో ఇసుక లారీల తిరుగుతున్నాయని.. ఇసుక మాఫియాతో వ్యవసాయ భూములు దెబ్బతింటున్నాయని, గ్రామ రహదారులు బీభత్సంగా మారుతున్నాయని గ్రామస్తులు ఆరోపించారు. ఇసుక రీచ్‌ను వెంటనే మూసివేయాలని డిమాండ్ చేస్తూ గ్రామస్తులు ప్రధాన రహదారిపై పురుగుల మందు డబ్బాలను అడ్డంగా పెట్టి బైఠాయించారు. గిరిజనులు, మహిళలు, వృద్ధులు సహా గ్రామ ప్రజలందరూ కలిసి ఆందోళన నిర్వహించారు. అయితే ఈ నిరసనకు అడ్డుపడేందుకు ప్రయత్నించిన ఇసుక సొసైటీ సభ్యులు గ్రామస్తులపై దాడికి తెగబడ్డారు. ఈ దాడిలో ఓ మహిళకు తీవ్ర గాయాలు కాగా, ఆమెను స్థానికులు వెంటనే ఆసుపత్రికి తరలించారు
గ్రామస్తులు మాట్లాడుతూ…
“ఎన్ని సార్లు ములుగు(Mulugu) జిల్లా కలెక్టర్‌కి ఫిర్యాదులు చేసినా ప్రయోజనం లేకుండా పోయింది. ఇసుక లారీల దందా రోజురోజుకూ పెరుగుతూనే ఉంది. రోడ్లు పాడైపోతున్నాయి… పంట పొలాల్లో దుమ్ము, దెబ్బలు తప్పడం లేదు. ప్రజల ఆరోగ్యం దెబ్బతింటోంది” అని ఆవేదన వ్యక్తం చేశారు. సొసైటీ సభ్యులు దాడి చేసిన ఘటన జిల్లాలో పెద్ద వివాదంగా మారింది. గతంలో కూడా ఇసుక మాఫియా వ్యవహారంపై అనేక ఫిర్యాదులు వచ్చినా చర్యలు జరగకపోవడంపై గ్రామస్తులు ఆగ్రహం వ్యక్తం చేస్తున్నారు. ప్రభుత్వ పెద్దలు తక్షణం జోక్యం చేసుకుని ఇసుక రీచ్‌ను నిలిపివేసి, బాధ్యులపై కఠిన చర్యలు తీసుకోవాలని డిమాండ్ చేస్తున్నారు.
గ్రామంలో ఉద్రిక్తత కొనసాగుతున్న నేపథ్యంలో పోలీసులు అక్కడకు చేరుకుని శాంతి భద్రతలు పటిష్టం చేశారు. ప్రజల న్యాయమైన డిమాండ్లు నెరవేర్చేవరకు పోరాటం కొనసాగిస్తామని గ్రామస్తులు స్పష్టం చేస్తున్నారు.
Read Also: కేసీఆర్ ఇంటికి కవిత సర్‌ప్రైజ్ విజిట్ !
Follow Us On : Youtube
