ఐఎస్ జగన్నాథపురం లక్ష్మీ నరసింహస్వామి ఆలయ అభివృద్ధి పనులకు ఆంధ్రప్రదేశ్ డిప్యూటీ సీఎం పవన్ కల్యాణ్(Pawan Kalyan) శ్రీకారం చుట్టారు. ఏలూరు జిల్లాలో గత పర్యటన సందర్భంగా ఆలయ అభివృద్ధికి కృషి చేస్తానని చెప్పారు. చెప్పినట్లుగానే రూ.8.7 కోట్ల వ్యవయంతో అభివృద్ధి పనులను ప్రారంభించారు. అంతేకాకుండా ఆలయ విస్తరణ కోసం 30 ఎకరాల భూమిని కూడా కేటాయించారు. ఆలయ ప్రదక్షిణ మండప నిర్మాణంతోపాటు గ్రామం నుంచి కొండ పైకి వెళ్లేందుకు రోడ్డు నిర్మింపచేస్తానని పవన్ గతంలో హామీ ఇచ్చారు. ఈ ఆలయ అభివృద్ధి అంశాన్ని ఏపీ క్యాబినెట్, మంత్రివర్గం దృష్టికి తీసుకువెళ్లారు. ఆలయ అభివృద్ధికి ప్రత్యేక నిధుల కేటాయించాలని సీఎం చంద్రబాబు, దేవాదాయ శాఖ మంత్రి ఆనం రామనారాయణ రెడ్డిని కోరారు. పవన్ అభ్యర్థన మేరకు ఆలయ అభివృద్ధికి రూ. 8.7 కోట్ల నిధులు విడుదల చేసింది ప్రభుత్వం.
సోమవారం ఐ.ఎస్.జగన్నాథపురం(I S Jagannadhapuram)లో పవన్ కల్యాణ్ పర్యటించారు. జిల్లా ఇంఛార్జ్, మంత్రి నాదెండ్ల మనోహర్‌తో కలిసి లక్ష్మీ నరసింహస్వామిని దర్శించుకున్నారు. అనంతరం రూ. 3.5 కోట్ల దేవాదాయ శాఖ నిధులతో ఆలయ ప్రాంగణంలో నిర్మించనున్న ప్రదక్షణ మండప పనులను ప్రారంభించారు. ఐఎస్ జగన్నాథపురం గ్రామం నుంచి ఆలయానికి వెళ్లేందుకు నూతన రహదారిని రూ. 3.7 కోట్లతో నిర్మించనున్నారు. దీంతో పాటు ఇప్పటికే ఆర్ అండ్ బి శాఖ సహాయంతో పొంగుటూరు, లక్కవరం మధ్య గోతుల మయంగా ఉన్న రహదారికి రూ.1.5 కోట్లతో మరమ్మతులు చేయించారు. ఏలూరు జిల్లా పర్యటనలో భాగంగా ఈ రహదారిని పరశీలించారు. గత పర్యటన సందర్భంగా ఆలయ పరిసరాల్లో అభివృద్ధి పనులు చేపట్టేందుకు ప్రభుత్వం నుంచి భూమి ఇప్పిస్తానని పవన్(Pawan Kalyan) హామీ ఇచ్చారు. ఆ ప్రకారం 30 ఎకరాల భూ కేటాయింపుకి సంబంధించిన పత్రాలు సోమవారం ఆలయ అధికారులకు అందజేశారు.
Read Also: బనకచర్లపై ఏపీ కొత్త ఎత్తుగడ !
Follow Us on : Pinterest
