రాష్ట్రంలో విలువైన ప్రభుత్వ భూములను ప్రైవేట్‌ వర్గాలకు అప్పగించేందుకు ముఖ్యమంత్రి రేవంత్‌రెడ్డి(Revanth Reddy) భారీ కుట్ర చేస్తున్నారని బీఆర్ఎస్ వర్కింగ్‌ ప్రెసిడెంట్‌ కేటీఆర్(KTR) ఆరోపించారు. హైదరాబాద్ తెలంగాణభవన్‌లో జరిగిన మీడియా సమావేశంలో ఆయన సంచలన ఆరోపణలు చేశారు. హైదరాబాద్ ఇండస్ట్రియల్ ల్యాండ్స్ ట్రాన్స్‌ఫర్మేషన్ పాలసీ’ (HILTP)ని పెద్ద భూకుంభకోణం కోసం రూపొందించిన బ్లూప్రింట్‌ అంటూ విమర్శించారు. బాలానగర్‌, జీడిమెట్ల, సనత్‌నగర్‌, అజామాబాద్‌ వంటి ముఖ్య పారిశ్రామిక క్లస్టర్లలో ఉన్న సుమారు 9,292 ఎకరాల ప్రభుత్వ భూములను ప్రభుత్వమే తక్కువ ధరకు ప్రైవేట్‌ వ్యక్తులకు అప్పగించేందుకు ప్రయత్నిస్తోందని ఆరోపించారు.
ఈ భూముల మార్కెట్ విలువ రూ.4.5–5 లక్షల కోట్లు, అయితే ప్రభుత్వం ఎస్‌ఆర్వో విలువలో కేవలం 30% నగదు చెల్లిస్తూ కేటాయించడానికి ప్రయత్నిస్తోంది. భూముల క్రమబద్ధీకరణకు ముందు సోదరులు, అనుచరులు, రియల్‌ ఎస్టేట్ గ్రూపుల మధ్య ముందస్తు ఒప్పందాలు జరిగాయని ఆయన ఆరోపించారు. బీఆర్ఎస్ ప్రభుత్వం అధికారంలో ఉండగా, పారిశ్రామిక భూముల క్రమబద్ధీకరణ కోసం ఎస్‌ఆర్వో రేట్లకు 100–200% అధిక రుసుము చెల్లించాల్సిన చట్టం తీసుకొచ్చింది. కానీ ఇప్పుడు కాంగ్రెస్ ప్రభుత్వం కేవలం 30% చెల్లించాల్సిందని భూములు కేటాయించడానికి చూస్తోంది. “ప్రజల ఆస్తిని తక్కువ ధరకు ప్రైవేట్‌ లాభాలకు ఇచ్చే ప్రయత్నం ఎందుకు?” అని ప్రశ్నించారు.
పాలసీ ఇంత వేగంగా ఆమోదిస్తారా?
హెచ్‌ఐఎల్‌టీపీ పాలసీని 7 రోజుల్లో దరఖాస్తులు, 7 రోజుల్లో ఆమోదం, 45 రోజుల్లో క్రమబద్ధీకరణ చేయాల్సిన అవసరం ఏమిటని ప్రశ్నించారు. “ఇంత త్వరగా ఎందుకు? ఇది పెద్ద కుంభకోణం అంటూ మండిపడ్డారు. భూములు కొనుగోలు చేసే పారిశ్రామికవేత్తలు, డెవలపర్లు తీవ్ర న్యాయపరమైన సమస్యలను ఎదుర్కోవాల్సి వస్తుందని కేటీఆర్(KTR) హెచ్చరించారు. బీఆర్ఎస్ తిరిగి అధికారంలోకి వచ్చిన తర్వాత అన్నీ రద్దు చేసి, చర్యలు తీసుకుంటామని తెలిపారు.
ప్రజా ఆస్తులను రక్షించాలి
భూములను పార్కులు, దవాఖానలు, ఇళ్ల నిర్మాణం, బహిరంగ వేలం కోసం వినియోగించాలి. ప్రజల ఖజానాకు వచ్చే విధంగా ప్రభుత్వం కనీసం 50% భూమిని స్వాధీనం చేసుకుని, మిగిలిన 50% మాత్రమే క్రమబద్ధీకరణ చేయాలి అని డిమాండ్‌ చేశారు. ముఖ్యంగా, రియల్‌ ఎస్టేట్ లాభాల కోసం భూములను క్రమబద్ధీకరిస్తూ ప్రజల ఆస్తిని దోచుకోవడమే కాంగ్రెస్ ప్రభుత్వ లక్ష్యమని ఆయన మండిపడ్డారు. “బీజేపీ ప్రభుత్వం స్పందించకపోతే, ఇది కాంగ్రెస్(Congress)–బీజేపీ(BJP) జాయింట్‌ వెంచర్‌ సర్కారు అని అర్థం. పాలసీ రద్దు కోసం బీఆర్ఎస్ న్యాయపోరాటం చేస్తుందని, ఉద్యమిస్తుందని పేర్కొన్నారు.
Read Also: దుబాయ్ ఎయిర్ షోలో కుప్పకూలిన భారత్ తేజస్..
Follow Us on: Youtube
