ఐ బొమ్మ(iBomma) కేసు రోజుకో మలుపు తిరుగుతోంది. ఇప్పటికే నిందితుడు రవి(Immadi Ravi) మీద పలు సెక్షన్ల కింద కేసులు నమోదు చేయగా.. తాజాగా మరో మూడు సెక్షన్ల కింద పోలీసులు కేసు నమోదు చేశారు. ఇప్పటికే ఐటీ యాక్ట్, బీఎన్ఎస్, సినిమాటోగ్రఫీ యాక్ట్, ఫారినర్స్ యాక్ట్‌ల కింద మొత్తం 10 సెక్షన్లు నమోదుచేసిన అధికారులు, తాజాగా మరో మూడు తీవ్రమైన సెక్షన్లు చేర్చారు. ఫోర్జరీకి సంబంధించిన సెక్షన్ చేర్చడంతో కేసు తీవ్రత మరింత పెరిగింది.
నకిలీ డాక్యుమెంట్లతో మోసం
‘ప్రహ్లాద్’ అనే వ్యక్తి పేరుతో రవి పాన్ కార్డ్, బైక్ లైసెన్స్, వాహన ఆర్‌సీలు సృష్టించినట్లు పోలీసులు గుర్తించారు. ఈ వివరాలను కోర్టులో అధికారిక మెమో రూపంలో సమర్పించారు. రవికి ఇవి ఎలా వచ్చాయి? ఏ ఉద్దేశంతో వాడాడు? అన్న కోణాల్లో విచారణ కొనసాగుతోంది. రవిని వచ్చే రెండు రోజుల్లో మరింత గట్టిగా ప్రశ్నించనున్నారు.
రవి వాడిన క్రిప్టో వాలెట్స్ వివరాలు, విదేశీ భాగస్వాములు, ప్రత్యేకంగా ఎన్‌ఆర్‌ఈ లావాదేవీలు నెదర్లాండ్స్‌(Netherlands)లో ఉన్నట్లు భావిస్తున్న హోమ్ సర్వర్ల సమాచారం దేశంలోని పలు బ్యాంక్ ఖాతాలు బెట్టింగ్ యాప్‌ల ప్రమోషన్‌కు సంబంధించిన డేటాను కూడా సేకరించబోతున్నారు. కేసులో భాగంగా రవికి కోర్టు ఐదు రోజుల పోలీసు కస్టడీ మంజూరు చేసింది. గురువారం మొదటి రోజే అధికారులు అతన్ని గంటల పాటు ప్రశ్నించారు. సీసీఎస్ పోలీసులు రవి బ్యాంక్ లావాదేవీలను పరిశీలించారు. అతని నెట్‌వర్క్ ఎలా విస్తరించింది? అన్న కోణంలోనూ విచారిస్తున్నట్టు సమాచారం.
ఐ బొమ్మ(iBomma) వెబ్‌సైట్‌ను నడపడానికి రవి ఏ విధంగా ఐపీ అడ్రస్‌లు మార్చేవాడు? ఏ టెక్నాలజీ వాడేవాడు? ఎలాంటి ప్రాక్సీలు, వీపీఎన్‌లు, సర్వర్లు వినియోగించేవాడు? అనే అంశాలపై పోలీసులు లోతుగా ఆరా తీశారు. ఐ బొమ్మ 1 నుంచి మూవీ రూల్స్ వెబ్‌సైట్‌కు ఆటోమేటిక్ రీడైరెక్షన్ ఎలా జరిగేది? ఈ ప్రక్రియ వెనక ఉన్న టెక్నికల్ మెకానిజం ఏమిటి? అన్న విషయాలను కూడా అధికారులు ట్రేస్ చేస్తున్నారు. పోలీసులు స్వాధీనం చేసుకున్న హార్డ్‌డిస్క్‌లన్నీ పాస్‌వర్డ్స్‌తో సెక్యూర్ చేసి ఉండటంతో, రవిని వాటి యాక్సెస్ కోసం ఉపయోగిస్తున్నారు. ఎథికల్ హ్యాకర్ల సహాయంతో ఆ డేటాను రికవర్ చేసే పనులు వేగంగా సాగుతున్నట్టు సమాచారం.
Read Also: రాజమౌళికి ఆర్జీవీ సపోర్ట్
Follow Us on : Pinterest
