కలం డెస్క్ : బూటకపు ఎన్‌కౌంటర్లకు తాము వ్యతిరేకమని, ప్రజల బాగు కోసం నక్సలైట్లు వారి స్వంత జీవితాలనే త్యాగం చేస్తున్నారని పీసీసీ చీఫ్ మహేశ్ కుమార్ గౌడ్(PCC Chief Mahesh Kumar) అన్నారు. హిడ్మా, గణపతి లాంటి కొందరు మావోయిస్టు పార్టీ నేతలపై తమకు గౌరవం ఉన్నదన్నారు. అటవీ ఖనిజ సంపదను, సహజ వనరులను కార్పొరేట్ సంస్థలకు కట్టబెట్టేందుకు కేంద్ర ప్రభుత్వం ప్రయత్నిస్తున్నదని ఆరోపించారు. లాభాలతో నడుస్తున్న ప్రభుత్వరంగ సంస్థలను ప్రైవేటుపరం చేస్తున్నదన్నారు. అధికారమే పరమావధిగా మోడీ, అమిత్ షా ప్రజా వ్యతిరేక నిర్ణయాలు తీసుకుంటున్నారని ఆరోపించారు. బూటకపు ఎన్ కౌంటర్లకు వ్యతిరేకంగా సీపీఐ ఆధ్వర్యంలో నగరంలో గురువారం జరిగిన రౌండ్ టేబుల్ కాన్ఫరెన్సులో పీసీసీ చీఫ్ మహేశ్ కుమార్ గౌడ్ పై వ్యాఖ్యలు చేశారు.
ఆపరేషన్ కగార్(Operation Kagar) పేరుతో కేంద్ర బలగాలు బూటకపు ఎన్‌కౌంటర్లు చేస్తున్నారని, మావోయిస్టు పార్టీ కార్యకర్తలు, లీడర్లను కక్షపూరితంగా అరెస్టు చేస్తున్నారని అన్నారు. జనజీవన స్రవంతిలోకి వస్తామంటున్నా కొందరిని కక్షపూర్తంగా భౌతికంగా నిర్మూలించడం మంచి పద్దతి కాదన్నారు. అటు పోలీసు బలగాలు, ఇటు మావోయిస్టులు.. ఇరువైపులా హింసను తాము వ్యతిరేకిస్తామని, కాంగ్రెస్ పార్టీ ఇలాంటి హింసను సమర్ధించదన్నారు. స్వతహాగా తాను నక్సలైట్ బాధితుడినని గుర్తుచేశారు. ఆపరేషన్ కగార్‌కు వ్యతిరేకంగా మాట్లాడినా, బూటకపు ఎన్‌కౌంటర్ల(Fake Encounters)కు వ్యతిరేకంగా గొంతెత్తినా దేశద్రోహి, అర్బన్ నక్సలైట్ ముద్ర వేస్తున్నారని బీజేపీ విధానాలను పీసీసీ చీఫ్(PCC Chief Mahesh Kumar) తప్పుపట్టారు.
Read Also: దానం, కడియంలకు స్పీకర్ నోటీసులు
Follow Us on: Youtube
