గ్రాషా మేషల్​కు ఇందిరా గాంధీ శాంతి బహుమతి

కలం, వెబ్​డెస్క్​: హక్కుల కార్యకర్త, విద్యా ప్రదాత, ఆఫ్రికన్​ మహిళ గ్రాషా మేషల్​కు ఇందిరా గాంధీ శాంతి బహుమతి (Indira Gandhi Peace Prize) లభించింది. ఈ మేరకు 2025 సంవత్సరానికి గాను ‘ఇందిరా గాంధీ ప్రైజ్​ ఫర్​ పీస్​, డిసార్మమెంట్స్​, అండ్​ డెవలప్​మెంట్​’ అవార్డుకు ఆమెను ఎంపిక చేసినట్లు ఇందిరా గాంధీ మెమోరియల్​ ట్రస్ట్​ బుధవారం ఓ ప్రకటనలో వెల్లడించింది. చదువు, ఆరోగ్యం, సంక్షేమం, ఆర్థిక స్వావలంబన, మానవత్వం తదితర రంగాల్లో అత్యంత సవాళ్లను ఎదుర్కొంటూ ఆమె చేసిన కృషికి ఈ అవార్డు అందించినట్లు ట్రస్ట్​ వెల్లడించింది. సామాజిక, ఆర్థికాభివృద్ధిలో గ్రాషా మేషల్​ చేసిన కృషి, ఆమె నాయకత్వ లక్షణాలు, వివిధ అంతర్జాతీయ సంస్థల్లో అందించిన సేవలు ప్రశంసనీయం అని కేంద్ర భదత్ర విభాగం మాజీ సలహాదారు శివ శంకర్​ మీనన్​ అధ్యక్షుడిగా ఉన్న జ్యూరీ కమిటీ పేర్కొంది.

ఎవరీ మేషల్​?

గ్రాషా మేషల్ ​(Graca Machel) అక్టోబర్​ 17, 1945లో మొజాంబిక్​లో జన్మించారు. మెథడిస్ట్​ స్కూల్స్​లో గ్రాడ్యుయేషన్​ అనంతరం, పోర్చుగల్​ రాజధాని లిస్బన్​లో పొలిటికల్​ సైన్స్​, జర్మనీ చదివారు. 1973లో స్వదేశానికి తిరిగివచ్చారు. మొజాంబిక్​ లిబరేషన్​ ప్రంట్​లో చేరి, దేశ స్వతంత్ర పోరాటంలో పాల్గొన్నారు. 1975లో దేశానికి స్వాతంత్య్రం వచ్చాక మొదటి విద్యా, సాంస్కృతిక శాఖ మంత్రి అయ్యారు. దేశ​ మొదటి ప్రెసిడెంట్​ సమోరా మోయిసెస్​ మేషల్​ను వివాహమాడారు. సమోరా 1986లో చనిపోయాక, దక్షిణాఫ్రికా మొదటి ప్రెసిడెంట్​ నెల్సన్​ మండేలాను ద్వితీయ వివాహం చేసుకున్నారు.

• మొజాంబిక్​లో విద్యాభివృద్ధి కోసం గ్రాషా మేషల్ విశేష కృషి చేశారు. బడిలో చేరే పిల్లల శాతాన్ని 40 నుంచి 90శాతానికి చేరేలా చేశారు. పిల్లల్లో దేశాల అంతర్యుద్ధాల ప్రభావంపై 1990లో ఐక్యరాజ్యసమితి ఏర్పాటుచేసిన కమిటీలో పనిచేశారు. యుద్ధ రంగాలకు వెళ్లి, ఆ ప్రాంతాల్లోని పిల్లల సంక్షేమం కోసం అనేక చర్యలు తీసుకున్నారు. ఆమె శ్రమను గుర్తించి యూఎన్​ నాన్సెన్​ రెఫ్యూజీ అవార్డు ప్రధానం చేసింది.
• ‘గర్ల్స్​ నాట్​ బ్రైడ్స్​’ అనే స్వచ్ఛంద సంస్థను గ్రాషా స్థాపించారు. బాలికల బాల్య వివాహాలను అరికట్టి, వాళ్లను విద్యావంతులుగా చేసేందుకు పని చేశారు.
• ఐక్యరాజ్య సమితి ఏర్పాటు చేసిన సస్టైనబుల్​ డెవలప్​మెంట్​ గోల్స్​ అడ్వకసీ గ్రూప్​లో మెంబర్​గా సేవలందించారు.
• 2010లో గ్రాషా మేషల్​ ట్రస్ట్​ ఏర్పాటుచేశారు. ఇది మహిళల ఆర్థిక సాధికారత, ఆహార భద్రత, సుపరిపాలనపై పనిచేస్తుంది.
• మహిళలు, పెద్దవాళ్ల ఆరోగ్య సంరక్షణ కోసం చేసిన కృషికి గాను వరల్డ్​ హెల్త్​ ఆర్గనైజేషన్​(డబ్యూహెచ్​వో) గోల్డ్​ మెడల్​ పొందారు.

Read Also: పీక్స్‌కి ట్రంప్ పీస్ డ్రామా.. 8 యుద్ధాల వాస్తవాలు ఇవే!

Follow Us On: Youtube