క‌లం, స్పోర్ట్స్‌: ఇంగ్లీష్ ఫుట్‌బాల్ క్లబ్ వెస్ట్ హామ్ యునైటెడ్ హెడ్ కోచ్‌గా మాజీ కెప్టెన్ స్కాట్ పార్కర్ (Scott Parker) బాధ్యతలు చేపట్టారు. ఈ మేరకు క్లబ్ యాజమాన్యం బుధవారం అధికారిక ప్రకటన విడుదల చేసింది. పార్కర్ క్లబ్‌తో రెండున్నరేళ్ల సుదీర్ఘ ఒప్పందంపై సంతకం చేశారు. వరుస ఓటముల వల్ల జట్టు పాయింట్ల పట్టికలో ఎనిమిదో స్థానానికి దిగజారడంతో పాత కోచ్ నూనో ఎస్పిరిటో శాంటోపై మంగళవారం వేటు పడింది.
ఆ స్థానంలో బాధ్యతలు స్వీకరించిన 46 ఏళ్ల పార్కర్, బుధవారం రాత్రి కార్డిఫ్ సిటీతో జరిగే మ్యాచ్ నుంచే ప్రత్యక్షంగా రంగంలోకి దిగనున్నారు. పార్కర్‌కు సాయంగా స్టీవ్ పోట్స్, గెరార్డ్ ప్రెండర్‌విల్లే, బిల్లీ లెపైన్‌లు కోచింగ్ బృందంలో పని చేయనున్నారు. వీరికి తోడు పార్కర్ మాజీ సహచరుడు మార్క్ నోబుల్ కూడా క్లబ్‌లో కీలక పాత్ర పోషించనున్నారు.
గతంలో ఫుల్‌హామ్, బౌర్న్‌మౌత్, బర్న్లీ క్లబ్‌లను ప్రిమియర్ లీగ్‌కు ప్రమోట్ చేసిన ఘనమైన ట్రాక్ రికార్డ్ పార్కర్ (Scott Parker) సొంతం. అంతేకాకుండా 2024/25 సీజన్‌లో బర్న్లీ జట్టుతో ఆయన మేనేజర్ ఆఫ్ ది సీజన్ అవార్డును గెలుచుకున్నారు. 2007 నుంచి 2011 మధ్య వెస్ట్ హామ్ తరఫున 129 మ్యాచ్‌లు ఆడి మూడుసార్లు ‘హ్యామర్ ఆఫ్ ది ఇయర్’ సాధించిన పార్కర్‌కు క్లబ్‌తో సుదీర్ఘ అనుబంధం ఉంది. తన కలల క్లబ్‌కు మళ్లీ కోచ్‌గా రావడం గర్వంగా ఉందని, అభిమానుల మద్దతుతో జట్టును తిరిగి ప్రిమియర్ లీగ్‌కు చేర్చడమే తన ప్రధాన ధ్యేయమని పార్కర్ స్పష్టం చేశారు. బోర్డు ఏకగ్రీవ నిర్ణయంతోనే పార్కర్‌ను నియమించామని వెస్ట్ హామ్ తాత్కాలిక సీఈఓ కరీమ్ విరానీ తెలిపారు.
Also Read : పీవీ సింధు వరల్డ్ టూర్ ఫైనల్స్‌కు అర్హత!
Follow Us On: X(Twitter)
