కలం, స్పోర్ట్స్ : సౌతాఫ్రికా గడ్డపై ఆస్ట్రేలియా(Australia) క్రికెట్ జట్టుకు ఊహించని షాక్ తగిలింది. తొలి ఇన్నింగ్స్‌లో భారీ ఆధిక్యం సాధించినా.. ఆసీస్ జట్టు చివరికి ఓటమిని చవిచూడాల్సి వచ్చింది. ఈ పరాజయంతో ఆస్ట్రేలియా టెస్ట్ సిరీస్‌ను కూడా కోల్పోయింది. మ్యాచ్ విషయానికి వస్తే.. సౌతాఫ్రికా నిర్దేశించిన 288 పరుగుల లక్ష్యంతో బరిలోకి దిగిన ఆస్ట్రేలియా జట్టు కేవలం 111 పరుగులకే ఆలైట్ అయింది. ప్రొటిస్ బౌలర్ల దాటికి ఆసీస్ బ్యాటర్లు పూర్తిగా చేతులెత్తేశారు. ఈ ఘోర ఓటమిపై ఆస్ట్రేలియా మాజీ ఓపెనర్ డేవిడ్ వార్నర్ (David Warner) తీవ్రంగా మండిపడ్డారు. జట్టు ప్రదర్శన కనీసం ఆస్ట్రేలియా తరహాలో లేదని ఆవేదన వ్యక్తం చేశారు.
ఈ మ్యాచ్‌లో సౌతాఫ్రికా స్పిన్నర్ సైమన్ హార్మర్ అద్భుతంగా రాణించాడు. కేవలం 16 పరుగులు మాత్రమే ఇచ్చి 6 వికెట్లు పడగొట్టాడు. మరోవైపు కగిసో రబాడా కూడా మూడు వికెట్లతో ఆసీస్ పతనాన్ని శాసించాడు. ఆస్ట్రేలియా ఇన్నింగ్స్‌లో కామెరాన్ గ్రీన్ (27), నాథన్ లియాన్ (33) మినహా ఎవరూ పెద్దగా పోరాటం చేయలేకపోయారు. గ్రీన్ తప్పిదం వల్ల ఇంగ్లిస్ రనౌట్ రూపంలో వెనుదిరగాల్సి వచ్చింది. మాజీ కెప్టెన్ గ్రేమ్ స్మిత్ కూడా ఆసీస్ రన్నింగ్ తీరును తప్పుబట్టారు. ఈ ఓటమి కారణంగా ఐసీసీ టెస్ట్ ఛాంపియన్‌షిప్ పాయింట్ల పట్టికలో ఆస్ట్రేలియా మూడో స్థానానికి పడిపోయింది. సౌతాఫ్రికా మాత్రం అగ్రస్థానానికి దూసుకెళ్లింది. క్రీడా రంగంలో విజయపరాజయాలు సహజమని, రాబోయే మ్యాచ్‌లలో జట్లు తమ ప్రణాళికలను సమీక్షించుకోవాల్సి ఉంటుందని విశ్లేషకులు భావిస్తున్నారు.
