కలం, వెబ్డెస్క్: వెనెజువెలా అధ్యక్షుడు నికోలస్ మదురో (Nicolas Maduro) అరెస్ట్ అవుతారని ఆన్లైన్లో బెట్టింగ్ వేసి రూ.కోట్లు సంపాదించాడో వ్యక్తి. వినడానికి ఆశ్చర్యంగా ఉన్నా ఇది నిజం. ఈ నెల 3న వెనెజువెలా రాజధాని కరాకస్లో మదురోను, అతని భార్యను అమెరికా సైన్యం అదుపులోకి తీసుకున్న విషయం తెలిసిందే. ఈ సంఘటన గురించి అమెరికా అధ్యక్షుడికి, మరికొందరు అత్యున్నత అధికారులకు, సైనిక చర్యలో పాల్గొన్నవాళ్లకు మాత్రమే ముందుగా తెలిసే అవకాశం ఉంది. మిగిలినవాళ్లకు తెలిసే అవకాశమే లేదు. అయితే, విచిత్రంగా మదురో అరెస్ట్ కావడానికి కొన్ని గంటల ముందు.. బ్లాక్చెయిన్ ఆధారంగా నడిచే పాలీమార్కెట్లో కొత్తగా ఒక ట్రేడింగ్ అకౌంట్ పుట్టుకొచ్చింది.
మదురో పదవి నుంచి దిగిపోతాడని, అరెస్ట్ అవుతారంటూ ఆ అకౌంట్ నుంచి 30వేల డాలర్లు (సుమారు 27లక్షలు) బెట్టింగ్ వేశారు. ఆ తర్వాత 24 గంటల్లోనే ఆ అకౌంట్కు సుమారు 4లక్షల డాలర్లకు పైగా(దాదాపు 4కోట్లు) లాభం వచ్చింది! దీంతో మదురో అరెస్ట్ విషయంలో ఇన్సైడర్ ట్రేడింగ్ జరిగిందని వ్యాపార వర్గాలు అనుమానిస్తున్నాయి. బెట్ వేసిన అకౌంట్ పెంటగాన్కు చెందిన, లేదా పెంటగాన్తో సంబంధం ఉన్న వ్యక్తిదని ట్రేడర్లు భావిస్తున్నారు.
మదురో (Nicolas Maduro) అరెస్ట్ మీద బెట్టింగ్పై ‘వాల్ స్ట్రీట్ జర్నల్’తో ఓ ట్రేడర్ మాట్లాడారు. పెంటగాన్ సమీపంలోని డొమినోస్ పిజ్జా అవుట్లెట్లలో అర్ధరాత్రి ఆర్డర్లు ఒక్కసారిగా పెరగడం గమనించి, తాను బెట్టింగ్ వేసి లాభపడినట్లు చెప్పారు. కాగా, ఏదైనా కంపెనీకి లేదా ప్రభుత్వ పాలసీకి సంబంధించిన రహస్య విషయం ముందుగానే తెలుసుకొని కంపెనీ షేర్లు కొనడం లేదా అమ్మడం ద్వారా లాభపడడాన్ని ఇన్సైడర్ ట్రేడింగ్ అంటారు. ప్రిడిక్షన్ మార్కెట్లో ఇన్సైడర్ల పాత్ర కొత్తేమీ కాకపోయినా మదురో అరెస్ట్ మీద వచ్చిన బెట్, అనంతరం లాభం చూసి ట్రేడర్లు ఆశ్చర్యపోతున్నారు. ‘కేవలం అంచనాలతో 30వేల డాలర్లను అర మిలియన్ డాలర్లుగా మార్చేశాడు. ట్రంప్ ఆఫీస్కు చెందిన వ్యక్తే పాలీమార్కెట్ను ఉపయోగించి, ఈ డబ్బు సంపాదించాడని అర్థం అవుతోంది’ అని ‘ఎక్స్’లో ఓ ట్రేడర్ ట్వీట్ చేయడం దీనికి బలం చేకూరుస్తోంది.
Read Also: జేడీ వాన్స్ నివాసంపై దాడి.. ఒకరి అరెస్ట్
Follow Us On: Youtube
