కలం, వెబ్ డెస్క్ : ఖైరతాబాద్ అసెంబ్లీ నియోజకవర్గ ఉపఎన్నిక (Khairatabad By-Election) నేపథ్యంలో కాంగ్రెస్‌లో టికెట్ ఆశావహుల మధ్య చర్చ మళ్లీ వేడెక్కింది. దివంగత పీజేఆర్‌ కుమార్తె, మాజీ కార్పొరేటర్‌ విజయారెడ్డి (Vijaya Reddy) చేసిన వ్యాఖ్యలు రాజకీయంగా ఆసక్తిని రేకెత్తిస్తున్నాయి. దానం నాగేందర్‌ను జాతీయ రాజకీయాల్లోకి పంపి, తనకు ఎమ్మెల్యే టికెట్ ఇస్తారని ఆమె పేర్కొన్నారు.
పీజేఆర్‌ పేరు లేకుండా కాంగ్రెస్‌ పార్టీ ఖైరతాబాద్‌లో ముందుకు సాగదని విజయారెడ్డి వ్యాఖ్యానించారు. ఈసారి పీజేఆర్‌ కుటుంబానికి న్యాయం జరుగుతుందని ప్రజలు భావిస్తున్నారని ఆమె అన్నారు.
కాంగ్రెస్‌లో టికెట్‌పై పోటీ
దానం నాగేందర్ (Danam Nagender) అనర్హత నేపథ్యంలో ఖైరతాబాద్ అసెంబ్లీ స్థానం ఖాళీ అయింది. ఈ నేపథ్యంలో ఉపఎన్నికకు కాంగ్రెస్‌ అభ్యర్థి ఎంపికపై పార్టీ వర్గాల్లో చర్చ జరుగుతోంది. విజయారెడ్డితో పాటు ఇతర నేతల పేర్లు కూడా పరిశీలనలో ఉన్నట్లు వార్తలు వచ్చాయి. విజయారెడ్డి వ్యాఖ్యలతో ఆమె వర్గంలో టికెట్ కోసం కసరత్తు ప్రారంభమైనట్లు తెలుస్తోంది. గతంలోనూ ఖైరతాబాద్ కాంగ్రెస్‌ వ్యవహారాల్లో విజయారెడ్డి, దానం నాగేందర్ వర్గాల మధ్య విభేదాలు వెలుగులోకి వచ్చాయి.
దానం నాగేందర్ భవిష్యత్‌పై ఆసక్తి
దానం నాగేందర్ ఖైరతాబాద్ నుంచి బరిలోకి దిగుతానని గతంలో సంకేతాలు ఇచ్చినప్పటికీ, ఏ పార్టీ నుంచి పోటీ చేస్తారనే విషయాన్ని స్పష్టంగా వెల్లడించలేదు. సుప్రీంకోర్టు ఆయన అనర్హతను సమర్థించిన అనంతరం ఖైరతాబాద్ ఉపఎన్నికకు మార్గం సుగమమైంది. ఈ నేపథ్యంలో విజయారెడ్డి చేసిన తాజా వ్యాఖ్యలు కాంగ్రెస్‌లో అభ్యర్థి ఎంపికపై చర్చకు మరింత ప్రాధాన్యం తీసుకొచ్చాయి. అయితే తుది అభ్యర్థిని కాంగ్రెస్‌ అధిష్ఠానం అధికారికంగా ప్రకటించాల్సి ఉంది.
