కలం, స్పోర్ట్స్ : హరారే స్పోర్ట్స్ క్లబ్ వేదికగా జరిగిన తొలి టీ20 పోరులో టీమిండియా ఆల్రౌండ్ షోతో అదరగొట్టింది. బౌలింగ్లో పేసర్లు విరుచుకుపడగా, ఛేజింగ్లో 15 ఏళ్ల కుర్రాడు వైభవ్ సూర్యవంశీ ఊచకోత కోశాడు. ఫలితంగా జింబాబ్వేను 7 వికెట్ల తేడాతో చిత్తు చేసిన భారత్, మూడు మ్యాచ్ల సిరీస్లో 1-0 ఆధిక్యంలో నిలిచింది. 126 పరుగుల స్వల్ప లక్ష్యాన్ని టీమిండియా కేవలం 13.2 ఓవర్లలో 3 వికెట్లు మాత్రమే కోల్పోయి ఊదేసింది.
టాస్ గెలిచి ముందుగా ఫీల్డింగ్ ఎంచుకున్న భారత నాయకుడు శ్రేయస్ అయ్యర్ నిర్ణయాన్ని బౌలర్లు సరైన సమయంలో సమర్థించుకున్నారు. పదునైన పేస్తో విరుచుకుపడిన మయాంక్ యాదవ్ (2/18), ప్రిన్స్ యాదవ్ (2/19) ప్రారంభంలోనే జింబాబ్వేను కోలుకోలేని దెబ్బతీశారు. ఓపెనర్ బ్రయాన్ బెన్నెట్ను తొలి ఓవర్లోనే మయాంక్ పెవిలియన్ పంపగా, బెన్ కర్రన్ (10), డియోన్ మైయర్స్ (6)లను ప్రిన్స్ యాదవ్ అవుట్ చేశాడు.
కెప్టెన్ సికందర్ రజా (4) ను శివం దూబే (1/32) బుట్టలో వేసుకోవడంతో జింబాబ్వే 32 పరుగులకే 4 వికెట్లు కోల్పోయి తీవ్ర కష్టాల్లో పడింది. మధ్య ఓవర్లలో బర్ల్ (26), మధ్వేరే (39) కాసేపు పోరాడినా, రవి బిష్ణోయ్ (1/24) కట్టుదిట్టమైన స్పిన్తో అడ్డుకట్ట వేశాడు. ఆఖరి ఓవర్లలో మరుమాని (27 నాటౌట్) వేగంగా పరుగులు సాధించడంతో జింబాబ్వే నిర్ణీత 20 ఓవర్లలో 7 వికెట్లకు 125 పరుగులు చేయగలిగింది.
లక్ష్య ఛేదనలో భారత్ ఆరంభంలోనే అభిషేక్ శర్మ (1) వికెట్ కోల్పోయినా.. క్రీజులోకి వచ్చిన 15 ఏళ్ల బ్యాటింగ్ సంచలనం వైభవ్ సూర్యవంశీ మ్యాచ్ను ఏకపక్షం చేశాడు. జింబాబ్వే బౌలర్లపై సిక్సర్లు, ఫోర్లతో విరుచుకుపడిన వైభవ్, కేవలం 18 బంతుల్లోనే అర్ధశతకం పూర్తి చేసుకున్నాడు. దాంతో అంతర్జాతీయ పురుషుల క్రికెట్లో అత్యంత పిన్న వయసులో హాఫ్ సెంచరీ సాధించిన ఆటగాడిగా ప్రపంచ రికార్డు నెలకొల్పాడు. 19 బంతుల్లో 4 ఫోర్లు, 4 సిక్సర్లతో 50 పరుగులు చేసి న్గారావా బౌలింగ్లో అవుటయ్యాడు.
అనంతరం ఇషాన్ కిషన్ (24 బంతుల్లో 35; 3 ఫోర్లు, 2 సిక్సర్లు), కెప్టెన్ శ్రేయస్ అయ్యర్ (24 బంతుల్లో 28 నాటౌట్) బాధ్యతాయుతంగా ఆడి విజయాన్ని ఖాయం చేశారు. ఆఖరిలో తిలక్ వర్మ (6 నాటౌట్)తో కలిసి అయ్యర్ పని పూర్తి చేశాడు. జింబాబ్వే బౌలర్లలో జుజారబానీ 2 వికెట్లు దక్కించుకున్నాడు. ఈ మ్యాచ్తో భారత్ ముందస్తుగా విభిన్న రోల్స్ కోసం కన్కషన్ సబ్స్టిట్యూట్లను (సూర్యాంశ్ షెడ్గే, ప్రభ్సిమ్రన్ సింగ్, హర్ష్ దూబే, యష్ ఠాకూర్) కూడా ప్రకటించడం గమనార్హం.
