కలం, స్పోర్ట్స్: ఐర్లాండ్తో తొలి టీ20 మ్యాచ్కు ముందు భారత జట్టు ఎంపికే ఇప్పుడు పెద్ద చర్చగా మారింది. కారణం యువ సంచలనం వైభవ్ సూర్యవంశీ (Vaibhav Sooryavanshi). అతడికి అరంగేట్ర అవకాశం ఇవ్వాలనే ఆసక్తి ఉన్నా, తుది జట్టులో అతడిని ఎక్కడ ఆడించాలనే ప్రశ్న టీమ్ మేనేజ్మెంట్కు సవాల్గా మారింది. శుక్రవారం స్టార్మోంట్లో జరిగే తొలి టీ20తో శ్రేయస్ అయ్యర్ కెప్టెన్సీ యుగం ప్రారంభం కానుంది. అయితే మ్యాచ్ కంటే ముందే వైభవ్ ఎంపికపై చర్చలు ఎక్కువగా జరుగుతున్నాయి.
ఐపీఎల్ 2026లో రాజస్థాన్ రాయల్స్ తరఫున వైభవ్ (Vaibhav Sooryavanshi) ఆడిన దూకుడు ఇన్నింగ్స్లు అందరి దృష్టిని ఆకర్షించాయి. ఆ తర్వాత శ్రీలంకలో జరిగిన ఇండియా-ఏ త్రైముఖ వన్డే టోర్నీ ఫైనల్లో 94 పరుగులు చేసి మరోసారి తన ప్రతిభను చాటుకున్నాడు. దీంతో అంతర్జాతీయ అరంగేట్రానికి అతడు బలమైన అభ్యర్థిగా మారాడు. అయితే సమస్య అంతా జట్టు కూర్పు దగ్గరే ఉంది. ఓపెనర్లుగా అభిషేక్ శర్మ, సంజూ శాంసన్ జోడీ ఇప్పటికే మంచి ఫలితాలు ఇచ్చింది.
ఇటీవల టీ20 ప్రపంచకప్ విజయంలో సంజూ కీలక పాత్ర పోషించాడు. మూడో స్థానంలో ఇషాన్ కిషన్ కూడా ఆకట్టుకుంటున్నాడు. దీంతో వైభవ్కు అవకాశం కల్పించాలంటే ప్రస్తుతం ఉన్న కూర్పులో మార్పులు చేయాల్సి రావచ్చు. ఇదే సమయంలో శ్రేయస్ అయ్యర్ కెప్టెన్గా తొలి సిరీస్కు సిద్ధమవుతున్నాడు. డిసెంబర్ 2023 తర్వాత మళ్లీ టీ20 జట్టులోకి వచ్చిన ఆయన, కొత్త బాధ్యతలతో జట్టును ముందుకు నడిపించేందుకు రెడీ అయ్యాడు.
మధ్య వరుసలో ఇషాన్ కిషన్, ఉప కెప్టెన్ తిలక్ వర్మతో కలిసి కీలక పాత్ర పోషించనున్నాడు. బౌలింగ్ విభాగంలో కూడా పోటీ ఆసక్తికరంగా ఉంది. గాయం నుంచి కోలుకున్న హర్షిత్ రాణాకు అవకాశం దక్కుతుందా లేదా ఇటీవల మెరుగైన ప్రదర్శన చేసిన ప్రిన్స్ యాదవ్, ప్రసిద్ధ్ కృష్ణల్లో ఎవరైనా తుది జట్టులోకి వస్తారా అన్నది చూడాలి. మరోవైపు ఐర్లాండ్ గాయాల సమస్యలతో ఇబ్బంది పడుతోంది. పాల్ స్టిర్లింగ్, మార్క్ అడైర్, జోష్ లిటిల్ సహా పలువురు కీలక ఆటగాళ్లు జట్టుకు దూరమయ్యారు.
కొత్త కెప్టెన్ లోర్కన్ టక్కర్ నాయకత్వంలో ఆ జట్టు సవాల్ను ఎదుర్కోనుంది. భారత్ ఇప్పటివరకు ఐర్లాండ్పై టీ20ల్లో ఎనిమిది మ్యాచ్లు ఆడి అన్నింట్లోనూ గెలిచింది. ఈసారి కూడా అదే జోరును కొనసాగించాలని చూస్తోంది. అయితే మ్యాచ్ ప్రారంభానికి ముందు అందరి మనసులో ఉన్న ప్రధాన ప్రశ్న ఒక్కటే. వైభవ్ సూర్యవంశీకి అవకాశం దక్కుతుందా? దక్కితే అతడి కోసం జట్టు కూర్పులో ఎలాంటి మార్పులు చేస్తారు? ఈ సమాధానం తుది జట్టు ప్రకటించిన తర్వాతే తెలుస్తుంది.
