కలం, కరీంనగర్ బ్యూరో: కరీంనగర్ నగరంలో జరుగుతున్న నీట్ రీ-ఎగ్జామ్ (NEET Re Exam)ను అత్యంత పారదర్శకంగా, ప్రశాంత వాతావరణంలో నిర్వహించేందుకు అన్ని రకాల పటిష్ట బందోబస్తు ఏర్పాట్లు చేసినట్లు కరీంనగర్ పోలీస్ కమిషనర్ (సీపీ) గౌష్ ఆలం, ఒక ప్రకటనలో తెలిపారు. నగరంలోని 7 పరీక్షా కేంద్రాలలో దాదాపు 3,000 మంది విద్యార్థులు ఈ పరీక్షకు హాజరవుతున్నట్లు ఆయన పేర్కొన్నారు.
సెక్షన్ 163 BNSS అమలు:
పరీక్షా కేంద్రాల పరిసర ప్రాంతాలలో ఎలాంటి అవాంఛనీయ సంఘటనలు జరగకుండా ముందస్తు చర్యగా ‘సెక్షన్ 163 BNSS’ (గతంలో సెక్షన్ 144) అమలు చేస్తున్నట్లు తెలిపారు.
రెండు అంచెల తనిఖీలు (Frisking):
పరీక్ష కేంద్రంలోకి వెళ్లే ప్రతి విద్యార్థిని రెండు స్థాయిల్లో క్షుణ్ణంగా తనిఖీ చేస్తున్నారు. మొదటి దశలో స్థానిక పోలీసులు, రెండో దశలో నేషనల్ టెస్టింగ్ ఏజెన్సీ (NTA) ప్రతినిధులు ఈ ఫ్రిస్కింగ్ నిర్వహిస్తున్నారు.
కేంద్ర బలగాల పహారా:
పరీక్షా కేంద్రాల వద్ద సరిపడా స్టాటిక్ బందోబస్తు ఏర్పాటు చేశామని, స్థానిక పోలీసులతో పాటు కేంద్ర బలగాలు (Central Forces) కూడా ఈ బందోబస్తులో చురుగ్గా పాల్గొంటున్నాయని తెలిపారు. కేంద్రాల చుట్టుపక్కల నిరంతరం పోలీస్ పెట్రోలింగ్ వాహనాలు నిఘా ఉంచుతాయన్నారు.
బయోమెట్రిక్ & నిఘా నేత్రాలు:
పరీక్ష హాల్లో ఎలాంటి అక్రమాలకు తావులేకుండా నేషనల్ టెస్టింగ్ ఏజెన్సీ ఆధ్వర్యంలో సీసీ కెమెరాలను ఏర్పాటు చేశారు. వీటిని పోలీస్ ఉన్నతాధికారులు స్వయంగా తనిఖీ చేశారు. ప్రతి విద్యార్థికి బయోమెట్రిక్ హాజరు తీసుకున్న తర్వాతే లోపలికి అనుమతిస్తున్నారు.
ఫిన్ జామర్లు (Fin Jammers):
సాంకేతిక పరిజ్ఞానాన్ని దుర్వినియోగం చేయకుండా, ఎలాంటి ఎలక్ట్రానిక్ మాల్ప్రాక్టీస్కు అవకాశం లేకుండా పరీక్ష గదుల్లో ప్రత్యేకంగా ‘ఫిన్ జామర్లను’ అమర్చినట్లు సీపీ వివరించారు.
పరీక్ష పూర్తయిన తర్వాత, ఆయా పరీక్షా పత్రాలను పటిష్టమైన పోలీసు ఎస్కార్ట్తో సురక్షితంగా హైదరాబాద్కు తరలిస్తామని సీపీ స్పష్టం చేశారు. విద్యార్థులు ఎలాంటి ఒత్తిడికి లోనుకాకుండా ప్రశాంతంగా పరీక్ష రాయాలని, పరీక్షల నియమ నిబంధనలను ప్రతీ ఒక్కరూ తప్పనిసరిగా పాటించాలని సీపీ గౌష్ ఆలం (SP Gaush Alam) కోరారు.
Read Also: భారత్ను చూసి అమెరికా నేర్చుకోవాలి.. ఫారిన్ యువతి ప్రశంసలు
Follow Us On: Instagram
