కలం, స్పోర్ట్స్ : ఆసియా గేమ్స్ (Asian Games) ఈత పోటీల్లో చైనాకు చెందిన 13 ఏళ్ల యు జిడీ (Yu Zidi) సరికొత్త చరిత్ర సృష్టించింది. సోమవారం జరిగిన మహిళల 200 మీటర్ల ఇండివిజువల్ మెడ్లే విభాగంలో ఆమె రెండో బంగారు పతకాన్ని కైవసం చేసుకుంది. ఈ రేసును యు జిడీ 2 నిమిషాల 6.10 సెకన్లలో ముగించి విజేతగా నిలిచింది. కెనడా స్టార్ సమ్మర్ మెక్ఇంటోష్ పేరిట ఉన్న ప్రపంచ రికార్డు సమయం 2:05.70 కి ఇది చాలా దగ్గరగా రావడం గమనార్హం.
ఆదివారం జరిగిన 200 మీటర్ల బటర్ఫ్లై విభాగంలోనూ యు జిడీ స్వర్ణం గెలుపొందింది. ఈ వారం చివర్లో ఆమె 400 మీటర్ల మెడ్లే రేసులో పోటీపడనుంది. మెక్ఇంటోష్ 2024 పారిస్ ఒలింపిక్స్లో సాధించిన పతకాల విభాగాల్లోనే యు జిడీ రాణిస్తోంది. వచ్చే ఏడాది జరిగే ప్రపంచ ఛాంపియన్షిప్ లేదా రెండేళ్ల తర్వాత జరగబోయే లాస్ ఏంజెల్స్ ఒలింపిక్స్లో వీరిద్దరి మధ్య హోరాహోరీ పోరు జరిగే అవకాశం ఉంది. గతేడాది సింగపూర్లో జరిగిన వరల్డ్ ఛాంపియన్షిప్లో 12 ఏళ్ల వయసులో యు జిడీ కాంస్య పతకం గెలుచుకుంది.
ఈ ఏడాది మార్చిలో జరిగిన పోటీల్లో పారిస్ ఒలింపిక్ సిల్వర్ మెడలిస్ట్ రీగన్ స్మిత్ను కూడా ఆమె ఓడించింది. 1951లో ప్రారంభమైన ఆసియా గేమ్స్ చరిత్రలో ఈమె (Yu Zidi) అత్యంత పిన్న వయస్కురాలైన పతక విజేత కాదా అనే దానిపై స్పష్టత లేదని అధికారులు తెలిపారు. కాగా ఈ పోటీల్లో చైనా ఈతగాళ్లు పతకాల పంట పండిస్తున్నారు. గతంలో 28 స్వర్ణాలు సాధించిన చైనా, ఈసారి ఆ రికార్డును దాటే దిశగా సాగుతోంది.
