అద్వైత యూత్ పార్లమెంట్‌లో సునీల్ రావు సందేశం

కలం, కరీంనగర్ : ఉన్నత చదువులు చదివిన యువత క్రియాశీల రాజకీయాల్లోకి అడుగుపెట్టినప్పుడే దేశ రాజకీయ వ్యవస్థలో పెను మార్పులు సాధ్యమవుతాయని బీజేపీ రాష్ట్ర అధికార ప్రతినిధి, నగర డిప్యూటీ మేయర్ యాదగిరి సునీల్ రావు (Yadagiri Sunil Rao) పిలుపునిచ్చారు. విద్యార్థులు చిన్న వయస్సు నుంచే పార్లమెంటరీ వ్యవస్థపై అవగాహన పెంచుకోవాలని, నిత్యం వార్తాపత్రికలు చదువుతూ పార్లమెంట్, అసెంబ్లీ సమావేశాలను వీక్షిస్తూ సమకాలీన రాజకీయాలపై పట్టు సాధించాలని సూచించారు.

గురువారం కరీంనగర్‌లోని త్రిధ హోటల్‌లో అద్వైత ఇంటర్నేషనల్ స్కూల్ ఆధ్వర్యంలో నిర్వహించిన ‘అద్వైత యూత్ పార్లమెంట్ 2026′(Advaita Youth Parliament) కార్యక్రమానికి ఆయన ముఖ్య అతిథిగా హాజరయ్యారు. వివేకానంద విద్యాసంస్థల చైర్మన్, కార్పొరేటర్ సౌగాని కొమరయ్యతో కలిసి జ్యోతి ప్రజ్వలన చేసి కార్యక్రమాన్ని ప్రారంభించారు. ఈ సందర్భంగా చిన్నారుల సాంస్కృతిక నృత్యాలు, ఎంపీల వేషధారణలో విద్యార్థులు నిర్వహించిన చర్చలు ఆకట్టుకున్నాయి.

ఈ సందర్భంగా యాదగిరి సునీల్ రావు మాట్లాడుతూ.. గత 30 ఏళ్లుగా రాజకీయాల్లో ఉంటూ ఆరు సార్లు కార్పొరేటర్‌గా, మేయర్‌గా, ప్రస్తుతం డిప్యూటీ మేయర్‌గా ప్రజాసేవ చేస్తున్నానని తెలిపారు. పొరుగు దేశాల్లో సైనిక పాలన, నియంతృత్వ పోకడలు, అస్థిర ప్రభుత్వాలు కనిపిస్తుంటే.. 148 కోట్ల జనాభా కలిగిన భారతదేశంలో స్వాతంత్ర్యం వచ్చినప్పటి నుంచి ప్రజాస్వామ్యం బలంగా కొనసాగుతోందని పేర్కొన్నారు.

ఇంతటి గొప్ప దేశంలో పౌరుడిగా పుట్టడం అదృష్టమన్నారు. గత 12 ఏళ్లుగా ప్రధాని నరేంద్ర మోదీ నాయకత్వంలో భారత్‌కు ప్రపంచవ్యాప్తంగా అరుదైన గౌరవం లభిస్తోందని, 35 దేశాలు ప్రధానమంత్రికి అత్యున్నత పురస్కారాలు అందించడం దేశానికి దక్కిన గౌరవమని కొనియాడారు. చిన్న వయసులోనే విద్యార్థులకు చట్టసభల పనితీరుపై అవగాహన కల్పిస్తున్న అద్వైత ఇంటర్నేషనల్ స్కూల్ యాజమాన్యాన్ని అభినందించారు. విద్యార్థులకు శుభాకాంక్షలు తెలిపారు. ఈ కార్యక్రమంలో పాఠశాల యాజమాన్యం, ఉపాధ్యాయులు, విద్యార్థులు తదితరులు పాల్గొన్నారు.

మ‌రిన్ని వార్త‌ల కోసం మా వాట్స‌ప్ ఛాన‌ల్ ఫాలో అవ్వండి

లేటెస్ట్ న్యూస్‌

Read More Latest News >>

ఎక్స్‌క్లూజివ్‌

Read More Exclusive Stories >>