కలం, స్పోర్ట్స్ : డబ్ల్యూపీఎల్ 2027 వేలానికి (WPL 2027 Auction) ముందు ముంబై ఇండియన్స్ కీలక మార్పులు చేసింది. ఆరుగురు ఆటగాళ్లను జట్టు నుంచి విడుదల చేసింది. ఈ జాబితాలో ఐదుగురు భారత ఆటగాళ్లు, ఒక విదేశీ ప్లేయర్ ఉన్నారు. సైకా ఇషాక్, జి.కమలిని, క్రాంతి రెడ్డి, పూనమ్ ఖేమ్నార్, త్రివేణి వశిష్టతో పాటు ఆస్ట్రేలియా ఫాస్ట్ బౌలర్ మిల్లీ ఇల్లింగ్వర్త్ను ముంబై విడుదల చేసింది. కమలిని విడుదల కావడం ప్రత్యేకంగా చర్చకు వచ్చింది. ఆమె ఆసియా కప్, ఆసియా క్రీడల్లో భారత జట్టులో సభ్యురాలిగా ఉంది.
అయితే అండర్-19 మహిళల టీ20 ప్రపంచకప్, డబ్ల్యూపీఎల్ 2027 షెడ్యూల్లు ఒకే సమయంలో ఉండే అవకాశం ఉంది. దీంతో కమలిని ప్రపంచకప్ కోసం అందుబాటులో ఉండే అవకాశం ఉందని సమాచారం. మరోవైపు ముంబై 11 మంది ఆటగాళ్లను కొనసాగించింది. కెప్టెన్ హర్మన్ప్రీత్ కౌర్తో పాటు హేలీ మాథ్యూస్, నాట్ స్కివర్-బ్రంట్, అమీలియా కెర్, షబ్నిమ్ ఇస్మాయిల్, నికోలా క్యారీ వంటి కీలక ఆటగాళ్లు ఇందులో ఉన్నారు. దేశీయ ఆటగాళ్లలో అమన్జోత్ కౌర్, సజీవన్ సజనా, రహీలా ఫిర్దౌస్, సంస్కృతి గుప్తా, వైష్ణవి శర్మను కూడా ముంబై కొనసాగించింది. అమన్జోత్ ప్రస్తుతం బెంగళూరులోని బీసీసీఐ సెంటర్ ఆఫ్ ఎక్సలెన్స్లో వెన్ను గాయం నుంచి కోలుకుంటున్నారు.
ఆటగాళ్ల వేలం అక్టోబర్ 28న కొచ్చిలో జరగనుంది. ముంబై ఇండియన్స్ రూ.కోటి పర్స్తో వేలంలోకి వెళ్లనుంది. ప్రతి సీజన్లో వేలం కొత్త సవాలేనని, బలమైన జట్టును నిర్మించడమే తమ లక్ష్యమని ముంబై ఇండియన్స్ మెంటార్ ఝులన్ గోస్వామి తెలిపారు.
