కలం, స్పోర్ట్స్ : లార్డ్స్ వేదికగా ఇంగ్లండ్తో జరిగిన మ్యాచ్లో టీమిండియా ఓడిపోయినా.. విరాట్ కోహ్లీ ఆడిన ఇన్నింగ్స్ ఇప్పుడు హాట్ టాపిక్గా మారింది. ఈ చారిత్రాత్మక మైదానంలో కోహ్లీ పరుగులను విమర్శించే వారికి మాజీ ఆల్రౌండర్ ఇర్ఫాన్ పఠాన్ (Irfan Pathan ) గట్టి కౌంటర్ ఇచ్చారు. కోహ్లీ ప్రపంచవ్యాప్తంగా తన సత్తా చాటాడని, అతని రేంజ్ను నిర్ణయించడానికి లార్డ్స్ పిచ్ ఒక్కటే ప్రామాణికం కాదని తేల్చి చెప్పారు. మ్యాచ్ విషయానికొస్తే.. 388 పరుగుల కొండంత లక్ష్యంతో బరిలోకి దిగిన భారత్కు ఓపెనర్ రోహిత్ శర్మ 138 పరుగులతో అదిరిపోయే స్టార్ట్ ఇచ్చారు. ఆ తర్వాత రోహిత్తో జతకలిసిన విరాట్ కోహ్లీ బాధ్యతాయుతంగా ఆడుతూ 74 పరుగుల కీలక ఇన్నింగ్స్ ఆడారు.
కోహ్లీ ఈ మ్యాచ్లో పరిస్థితులకు తగ్గట్టు గేర్ మార్చిన విధానాన్ని పఠాన్ ప్రశంసించారు. ముఖ్యంగా 45 పరుగుల మార్క్ దాటాక, రన్ రేట్ ఒత్తిడిని గమనించి కోహ్లీ వేగంగా ఆడటం మొదలుపెట్టారని చెప్పారు. భారత బౌలర్లు డెత్ ఓవర్లలో కాస్త కట్టడి చేసి ఉంటే, అలాగే కోహ్లీ మరికొంత సమయం క్రీజులో నిలిచి ఉంటే మ్యాచ్ ఫలితం మరోలా ఉండేదని అభిప్రాయపడ్డారు. కానీ ఆఖర్లో ఇంగ్లండ్ బౌలర్లు కచ్చితమైన లైన్ అండ్ లెంగ్త్తో బౌలింగ్ చేయడంతో టీమిండియా మిడిలార్డర్ ఒత్తిడికి లోనైంది. ఫలితంగా భారత్ 27 పరుగుల తేడాతో ఓటమి చవిచూసింది.
ఈ గెలుపుతో మూడు మ్యాచ్ల వన్డే సిరీస్ను ఇంగ్లండ్ 2-1తో చేజిక్కించుకుంది. మ్యాచ్ అనంతరం జియోస్టార్తో మాట్లాడిన ఇర్ఫాన్ పఠాన్.. లార్డ్స్లో పరుగులు చేయడానికే ఎందుకు అంత హైప్ ఇస్తారో అర్థం కాదన్నారు. ఒకవేళ ఇక్కడ కోహ్లీ హాఫ్ సెంచరీ చేయకపోయినా ప్రపంచ క్రికెట్లో అతని ప్రాధాన్యత ఏమాత్రం తగ్గదని స్పష్టం చేశారు. ఫ్యాన్స్ కూడా దీనికి అంత ప్రాధాన్యత ఇవ్వాల్సిన అవసరం లేదని, విరాట్ కోహ్లీ ఎప్పటికీ మాస్టరేనని పఠాన్ పేర్కొన్నారు.
