కలం, వెబ్ డెస్క్ : టీమిండియాలో మరో కొత్త ముఖం కనిపించబోతోంది. గాయంతో నితీశ్ కుమార్ రెడ్డి(Nitish Kumar Reddy) జట్టుకు దూరం కావడంతో, ముంబై యువ ఆల్రౌండర్ సూర్యాన్ష్ షెడ్గేకు (Suryansh Shedge) జీవితంలోనే అతిపెద్ద అవకాశం దక్కింది. ఐర్లాండ్, ఇంగ్లండ్ పర్యటనల కోసం భారత జట్టులో అతడిని ఎంపిక చేశారు. అఫ్గానిస్థాన్తో జరిగిన మూడో వన్డే తర్వాత నితీశ్ ఎడమ కాలి క్వాడ్రిసెప్స్ కండరంలో నొప్పిని అనుభవించాడు. వైద్య పరీక్షలలో వాపుతో పాటు కండరాల దెబ్బతినడం బయటపడింది. దీంతో అతడికి విశ్రాంతి, పునరావాసం అవసరమని బీసీసీఐ వైద్య బృందం సూచించింది. ఈ కారణంగా ఐర్లాండ్, ఇంగ్లండ్ సిరీస్లకు అతడు దూరమయ్యాడు. కోలుకోవడానికి కనీసం నాలుగు వారాలు పట్టే అవకాశం ఉందని తెలుస్తోంది.
నితీశ్ గాయం టీమిండియాకు ఎదురుదెబ్బగా మారింది. ఇప్పటికే హార్దిక్ పాండ్యా కూడా క్వాడ్రిసెప్స్ సమస్యతో ఇబ్బంది పడుతున్న నేపథ్యంలో, మరో పేస్ బౌలింగ్ ఆల్రౌండర్ కోసం ఎంపిక కమిటీ సూర్యాన్ష్ షెడ్గేపై నమ్మకం ఉంచింది. 23 ఏళ్ల షెడ్గే పేరు గత కొంతకాలంగా దేశీయ క్రికెట్లో బలంగా వినిపిస్తోంది. ఇటీవల శ్రీలంకలో జరిగిన ఇండియా-ఏ త్రైసిరీస్లో అతడు అద్భుత ప్రదర్శన కనబరిచాడు. ఐదు మ్యాచ్లలో 147 పరుగులు చేసి మిడిల్ ఆర్డర్లో కీలక పాత్ర పోషించాడు. అతడి ప్రదర్శనే జాతీయ జట్టు తలుపులు తెరిచింది. 2024-25 సయ్యద్ ముస్తాక్ అలీ ట్రోఫీలో ముంబై టైటిల్ గెలవడంలో షెడ్గే కీలక పాత్ర పోషించాడు. దిగువ వరుసలో బ్యాటింగ్ చేస్తూ 131 పరుగులు చేసి, 251.92 స్ట్రైక్రేట్తో ఆకట్టుకున్నాడు. ఫైనల్లో కేవలం 15 బంతులలో 36 పరుగులు చేసి మ్యాచ్ను ముంబై వైపు తిప్పడంతో పాటు ఒక వికెట్ తీసి ‘ప్లేయర్ ఆఫ్ ది ఫైనల్’ అవార్డు అందుకున్నాడు.
ఐపీఎల్లో కూడా షెడ్గే తన ప్రతిభను చాటుకున్నాడు. గత రెండు సీజన్లలో పంజాబ్ కింగ్స్ తరఫున 12 మ్యాచ్లు ఆడి 165 పరుగులు చేసి ఫినిషర్గా గుర్తింపు పొందాడు. అంతకుముందు 2023లో లక్నో సూపర్ జెయింట్స్ జట్టులో రీప్లేస్మెంట్ ప్లేయర్గా ఉన్నాడు. వైట్బాల్ క్రికెట్తో పాటు రెడ్బాల్ క్రికెట్లో కూడా అతడి ప్రదర్శన ఆకట్టుకునేలా ఉంది. ఎనిమిది ఫస్ట్క్లాస్ మ్యాచ్లలో 439 పరుగులు చేసి, సగటు దాదాపు 44గా నిలిచాడు. నాలుగు అర్ధ సెంచరీలు నమోదు చేశాడు.
ఇప్పుడు ఐర్లాండ్, ఇంగ్లండ్ పర్యటనలతో షెడ్గే కెరీర్లో కొత్త అధ్యాయం ప్రారంభం కానుంది. జాతీయ జట్టులో చోటు సంపాదించిన ఈ యువ ఆల్రౌండర్కు ఇది పెద్ద పరీక్షతో పాటు, తన ప్రతిభను నిరూపించుకునే అరుదైన అవకాశం. భారత్ జట్టు జూన్ 26, 28 తేదీలలో ఐర్లాండ్తో రెండు టీ20 మ్యాచ్లు ఆడనుంది. ఆ తర్వాత జూలై 1 నుంచి ఇంగ్లండ్ పర్యటన ప్రారంభం కానుంది. ఈ సిరీస్లలో అందరి దృష్టి ఇప్పుడు సూర్యాన్ష్ షెడ్గేపైనే ఉండనుంది.
