కలం, మెదక్ బ్యూరో : సిద్దిపేట (Siddipet) జిల్లాలో మంగళవారం ఒక విషాదకర సంఘటన చోటు చేసుకుంది. అర్బన్ మండలం మిట్టపల్లి (Mittapalli) గ్రామం వద్ద సిద్దిపేట – వరంగల్ ప్రధాన రహదారిపై జరిగిన ఒక ఘోర రోడ్డు ప్రమాదంలో ఇద్దరు వ్యక్తులు అక్కడికక్కడే ప్రాణాలు కోల్పోయారు. స్థానికులు, పోలీసుల కథనం ప్రకారం.. వేగంగా దూసుకొచ్చిన ఒక కారు, రోడ్డు పక్కన ఆగి ఉన్న లారీని వెనుక భాగం నుండి బలంగా ఢీకొట్టింది. ఈ ప్రమాద తీవ్రతకు కారు లారీ కిందకు దూసుకుపోయి పూర్తిగా నలిగిపోయింది. కారులో ప్రయాణిస్తున్న రవి, సునీత అనే దంపతులు తీవ్ర గాయాలపాలై అక్కడికక్కడే దుర్మరణం చెందారు. ప్రమాదం జరిగిన వెంటనే కారు లారీ కింద ఇరుక్కుపోవడంతో, మృతదేహాలను, క్షతగాత్రులను బయటకు తీయడానికి పోలీసులకు, స్థానికులకు దాదాపు అరగంటకు పైగా సమయం పట్టింది.
ఈ ప్రమాదంలో కారులో ఉన్న మరో ఇద్దరి పరిస్థితి విషమంగా మారడంతో వారిని చికిత్స నిమిత్తం ఆసుపత్రికి తరలించారు. ప్రాణాలు కోల్పోయిన దంపతులు భద్రాద్రి కొత్తగూడెం జిల్లాలోని మణుగూరు ప్రాంతానికి చెందిన వారిగా పోలీసులు ప్రాథమికంగా గుర్తించారు. సమాచారం అందుకున్న వెంటనే ఘటనా స్థలానికి చేరుకున్న పోలీసులు సహాయక చర్యలు చేపట్టి, మృతదేహాలను పోస్టుమార్టం నిమిత్తం సిద్దిపేట ప్రభుత్వ ఆసుపత్రికి తరలించారు. అనంతరం రహదారిపై ట్రాఫిక్ను క్రమబద్ధీకరించి, ప్రమాదానికి గల కారణాలపై కేసు నమోదు చేసుకుని దర్యాప్తు ప్రారంభించారు.
