కలం, స్పోర్ట్స్ : చైనా మాస్టర్స్ బ్యాడ్మింటన్ టోర్నీ పురుషుల డబుల్స్ కేటగిరీలో భారత స్టార్ జోడీ సాత్విక్ సాయిరాజ్ రంకిరెడ్డి, చిరాగ్ శెట్టి (Satwik-Chirag Shetty) అద్భుత విజయం సాధించి ఛాంపియన్గా నిలిచారు. ఆదివారం జరిగిన ఉత్కంఠభరితమైన ఫైనల్ పోరులో భారత జంట, చైనాకు చెందిన హే జీ టింగ్, రెన్ జియాంగ్ యు లతో తలపడింది. మ్యాచ్ ప్రారంభంలో తీవ్ర ఒత్తిడి ఎదుర్కొన్న సాత్విక్-చిరాగ్ వరుస తప్పిదాలు చేయడంతో తొలి సెట్ను 11-21 తేడాతో కోల్పోయారు.
అయితే రెండో సెట్లో అనూహ్యంగా పుంజుకుని, మెరుపు దాడులతో ప్రత్యర్థిని కోలుకోనీయకుండా 21-13తో నెగ్గి మ్యాచ్ను సమం చేశారు. విజేతను నిర్ణయించే మూడో సెట్లో కూడా తీవ్ర పోటీ నెలకొంది. ఒక దశలో 9-11తో వెనుకబడినప్పటికీ, పట్టువదలకుండా పోరాడిన భారత జోడీ 16-16తో స్కోరు సమం చేసి, చివర్లో వరుస పాయింట్లతో 21-17 తేడాతో విజయాన్ని అందుకుంది. గంటా 10 నిమిషాల పాటు సాగిన ఈ హోరాహోరీ పోరులో 11-21, 21-13, 21-17తో ప్రత్యర్థిని మట్టికరిపించారు.
గతంలో 2023, 2025 ఎడిషన్లలో రన్నరప్గా నిలిచిన సాత్విక్-చిరాగ్ (Satwik-Chirag) జోడీకి ఈ టోర్నీలో ఇది తొలి స్వర్ణం కావడం విశేషం. అలాగే సింగపూర్ ఓపెన్ సూపర్ 750 టైటిల్ తర్వాత ఈ సీజన్లో వారికిది రెండో ఖ్యాతి. అంతకుముందు శనివారం జరిగిన సెమీఫైనల్లో మలేషియా జోడీపై గెలిచి తుదిపోరుకు అర్హత సాధించిన సంగతి తెలిసిందే. ఈ విజయంతో సాత్విక్-చిరాగ్ జంట ప్రపంచ బ్యాడ్మింటన్ రంగంలో తమ తిరుగులేని ఆధిపత్యాన్ని మరోసారి చాటుకుంది.
Also Read : పాక్ ఆటగాళ్ల ఫోన్లు స్వాధీనం.. అసలేం జరుగుతోంది?
Follow Us On: X(Twitter)
