ఢిల్లీలోని ఎర్రకోట సమీపంలో జరిగిన బ్లాస్టింగ్(Red Fort Blast) కేసు విచారణ ముమ్మరంగా కొనసాగుతున్న విషయం తెలిసిందే. ఈ కేసులో ఉగ్రమూలాలు దేశవ్యాప్తంగా పలు రాష్ట్రాల నుంచి బయటపడుతున్నాయి. ఈ నేపథ్యంలో తాజాగా నలుగురు నిందితులను ఎన్ఐఏ అదుపులోకి తీసుకున్నది. నవంబర్ 10న చోటుచేసుకున్న కారు బ్లాస్ట్ కేసు దర్యాప్తు వేగవంతం అయ్యింది. కేసు వెనుకున్న అసలు ముఠాను గుర్తించి మొత్తం కుట్ర వలయాన్ని ఛేదించేందుకు ఎన్ఐఏ పలు రాష్ట్రాల్లో ఒకేసారి దాడులు నిర్వహిస్తోంది.
తాజా దర్యాప్తులో భాగంగా ఎన్ఐఏ శ్రీనగర్‌లో మరో నలుగురు ప్రధాన నిందితులను అరెస్ట్ చేసింది. కొత్తగా అరెస్టయిన నిందితులతో ఈ కేసులో అదుపులోకి తీసుకున్న వారి సంఖ్య మొత్తం ఆరుకు చేరింది. తాజా అరెస్టైన వారిలో పుల్వామా జిల్లాకు చెందిన డాక్టర్ ముజమ్మిల్ షకీల్ గనై, అనంతనాగ్ జిల్లాకు చెందిన డాక్టర్ అదీల్ అహ్మద్ రాథర్, షోపియన్ ప్రాంతానికి చెందిన మౌలానా ఇర్ఫాన్ అహ్మద్, యూపీ రాజధాని లక్నోకు చెందిన డాక్టర్ షాహీన్ సయీద్ ఉన్నారు. ఈ నలుగురు నిందితులు పేలుడు ప్రణాళిక, అమలు, సహకారం, లాజిస్టికల్ సపోర్ట్ చేసినట్టు ఎన్ఐఏ ప్రాథమికంగా నిర్ధారించింది.
ఇంతకుముందు ఎన్ఐఏ ఈ కేసుకు సంబంధించి ఇద్దరిని అరెస్ట్ చేసింది. వారిలో అమీర్ రషీద్ అలీ ఒకడు. బ్లాస్ట్‌కు ఉపయోగించిన కారు ఈయన పేరుతో రిజిస్టర్ అయి ఉండటం కేసులో ఆయన పాత్రపై సందేహాలు రేకెత్తించింది. జసీర్ బిలాల్ వాణి @ దానిష్ ప్రధాన ఉగ్రవాదికి టెక్నికల్ సపోర్ట్ అందించి, కమ్యూనికేషన్ సిస్టమ్, డివైజ్ హ్యాండ్లింగ్, డిజిటల్ రూటింగ్ వంటి కీలక సహాయం చేసినట్లు ఎన్ఐఏ గుర్తించింది.
ఈ ఇద్దరిపై ప్రస్తుతం విచారణ ఇప్పటికే కొనసాగుతోంది. దర్యాప్తులో వస్తున్న సమాచారంతో ఈ నెట్‌వర్క్ విస్తృతి మరింత స్పష్టమవుతోందని అధికారులు వెల్లడిస్తున్నారు. దాడి వెనుక ఉన్న మొత్తం చైన్ ను ఛేదించాలని ఎన్ఐఏ భావిస్తోంది. నిందితుల మధ్య కమ్యూనికేషన్ నెట్‌వర్క్ ను ఛేదించాలని చూస్తోంది. ఇటువంటి ఉగ్రమూకలు దేశంలో ఇంకా ఎక్కడెక్కడ ఏయే రూపాల్లో ఉన్నారా? అని ఆరా తీస్తోంది. పేలుడు పదార్థాలు ఎక్కడి నుంచి పొందారు? సాంకేతిక సహకారం అందించింది ఎవరు? ఫండింగ్ ఎక్కడి నుంచి వచ్చింది? దేశీ, విదేశీ సంస్థలతో లింకులు ఉన్నాయా? అన్న కోణంలో దర్యాప్తు సాగుతోంది.
దాడికి సంబంధించి జమ్మూ & కశ్మీర్‌లోని పలువురు వ్యక్తులు, మత సంబంధిత ప్రముఖులు, విద్యావంతులు చేరడం కేసును మరింత సెన్సిటివ్‌గా మార్చింది. ఈ నేపథ్యంలో కేంద్ర హోం మంత్రిత్వశాఖ ప్రత్యక్ష పర్యవేక్షణలో ఎన్ఐఏ పని చేస్తోంది. భారత్‌లో అత్యంత భద్రతా వలయం కలిగిన ఎర్రకోట ప్రాంతంలో బ్లాస్ట్(Red Fort Blast) జరగడం వల్ల ఈ కేసు కేవలం క్రైమ్ ఇన్వెస్టిగేషన్‌గా కాకుండా, పెద్ద ఉగ్ర నెట్‌వర్క్‌ను ఛేదించే ఆపరేషన్‌గా పనిచేస్తోంది. ఈ కేసులో రోజుకో కొత్త కోణం వెలుగు చూస్తోంది.
Read Also: ప్రియాంకాగాంధీ భర్తపై ఈడీ ఛార్జిషీట్
Follow Us on: Youtube
