కలం, స్పోర్ట్స్: రింగ్లో ప్రత్యర్థులతో పోరాడే ప్రీతీ పవార్ (Preeti Pawar).. బయట మాత్రం కాగితాలతో కళాకృతులు చేస్తోంది. బాక్సింగ్లో ఒత్తిడి తగ్గించుకునేందుకు క్విల్లింగ్, కాలిగ్రఫీ తనకు ఎంతో ఉపయోగపడుతున్నాయని ఏషియన్ బాక్సింగ్ ఛాంపియన్షిప్ స్వర్ణ పతక విజేత ప్రీతీ పవార్ తెలిపింది. పెద్ద టోర్నీల సమయంలో ఎక్కువగా ఆలోచించడం మంచిది కాదని, క్విల్లింగ్ చేస్తే కొంతసేపు క్రీడకు దూరంగా ఉండగలుగుతున్నానని తెలిపింది. దీంతో మనసు ప్రశాంతంగా మారుతుందని పేర్కొంది.
ఖాళీ సమయంలో క్విల్లింగ్..
కామన్వెల్త్ గేమ్స్కు ముందు బెల్ఫాస్ట్లో శిక్షణ శిబిరం జరిగిన సమయంలో కూడా ఖాళీ సమయాన్ని క్విల్లింగ్ కోసం ఉపయోగించినట్లు ప్రీతీ పవార్ తెలిపింది. తన సహచరుల కోసం పోస్టర్లు కూడా తయారు చేసినట్లు చెప్పింది. హైజంపర్ తేజస్విన్ శంకర్ కోసం కూడా ప్రత్యేకంగా ఓ కళాకృతిని తయారు చేసింది. గాయం నుంచి తిరిగి వచ్చి అతడు సాధించిన విజయంతో ప్రేరణ పొందినట్లు ప్రీతీ తెలిపింది. తేజస్విన్ తన రికవరీ, మైండ్సెట్ గురించి చెప్పిన విషయాలు తనను బాగా ప్రభావితం చేశాయని పేర్కొంది.
బరువు తగ్గించడం సవాలే..
ఇక బాక్సింగ్లో బరువు తగ్గించడం కూడా పెద్ద సవాలేనని ప్రీతీ తెలిపింది. మ్యాచ్కు ముందు సుమారు 1.5 కిలోల వరకు బరువు తగ్గాల్సి వస్తుందని చెప్పింది. వెయిట్ ఇన్ పూర్తయ్యే వరకు ఆహారం తీసుకోకుండా ఉండటం, ఆ తర్వాత వెంటనే శరీరానికి నీరు, పోషకాలు అందించడం చాలా ముఖ్యమని వివరించింది. మ్యాచ్కు ముందు ప్రీతీ పూర్తి ప్లాన్తో సిద్ధమవుతుంది. ఒక రోజు ముందే బౌట్ ప్లాన్ చేసుకుంటుంది. ఉదయం బరువు తగ్గించి, వెయిట్ ఇన్ పూర్తయిన తర్వాత రీహైడ్రేషన్, సరైన ఆహారం తీసుకుంటుంది.
ఆసియా గేమ్స్పై దృష్టి..
సమయం ఉంటే కొద్దిసేపు నిద్రపోతుంది. మ్యాచ్కు ముందు బౌట్ను మైండ్లో ఊహించుకోవడం కూడా తనకు ఉపయోగపడుతుందని ప్రీతీ తెలిపింది. ఇది మానసికంగా సిద్ధం కావడానికి సహాయపడుతుందని చెప్పింది. ఇటీవల ఏషియన్ బాక్సింగ్ ఛాంపియన్షిప్లో స్వర్ణం గెలిచిన ప్రీతీ.. ఇప్పుడు ఆసియా గేమ్స్పై దృష్టి పెట్టింది. రాబోయే శిక్షణ శిబిరాల్లో కోచ్లతో కలిసి తన వ్యూహాలను మరింత మెరుగుపరుచుకోవాలని భావిస్తోంది.
గేమ్ ప్లాన్తో బరిలోకి..
ఆసియా గేమ్స్లో పోటీ గట్టిగానే ఉంటుందని ప్రీతీ తెలిపింది. ఆసియాలో చాలా దేశాలు బాక్సింగ్లో బలంగా ఉన్నాయని చెప్పింది. ఏషియన్ ఛాంపియన్షిప్లో ఎదురైన ప్రత్యర్థులే ఆసియా గేమ్స్లో కూడా ఎదురయ్యే అవకాశం ఉందని పేర్కొంది. అందుకే శిక్షణ శిబిరంలో కోచ్లతో కలిసి ఏ అంశాలపై పని చేయాలి, ఎలాంటి గేమ్ ప్లాన్తో బరిలోకి దిగాలి అనే విషయాలపై నిర్ణయం తీసుకోనున్నట్లు ప్రీతీ తెలిపింది.
