కలం, స్పోర్ట్స్ : భారత ఫాస్ట్ బౌలర్ ప్రసిద్ధ్ కృష్ణ (Prasidh Krishna) గాయం కారణంగా కనీసం మూడు వారాల పాటు ఆటకు దూరం కానున్నారు. వచ్చే నెల నవంబర్ 4 నుంచి మొదలయ్యే న్యూజిలాండ్ వన్డే సిరీస్‌ నాటికి ఆయన కోలుకోవడం అనుమానంగానే కనిపిస్తోంది. వెస్టిండీస్‌తో గౌహతిలో జరిగిన రెండో వన్డేలో బౌలింగ్ చేస్తుండగా ఆయన ఎడమ తొడ కండరాలు పట్టేశాయి. కేవలం ఐదు ఓవర్లు మాత్రమే వేసి ఆయన మైదానాన్ని వీడారు. అనంతరం చండీగఢ్‌లో జరిగిన మూడో మ్యాచ్‌కు దూరమయ్యారు. ఈ సిరీస్‌లో ఆడిన రెండు మ్యాచుల్లో ప్రసిద్ధ్ మూడు వికెట్లు తీశారు.
కోలుకోవడానికి ఆయన బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో చేరారు. ప్రసిద్ధ్ (Prasidh Krishna) పూర్తి ఫిట్‌నెస్ సాధించడానికి మూడు వారాలు పడుతుందని, తీవ్రతతో బౌలింగ్ చేయడానికి మరో వారం సమయం పడుతుందని అంచనా. దీంతో అక్టోబర్ 11 నుంచి ప్రారంభమయ్యే రంజీ ట్రోఫీ తొలి రౌండ్‌లో కర్ణాటక తరఫున ఆయన ఆడటం కష్టమే. గాయం తీవ్రత వల్ల న్యూజిలాండ్ వన్డే సిరీస్‌ సమయానికి ప్రసిద్ధ్ అందుబాటులో ఉండటం సవాలుగా మారింది.
ఒకవేళ అప్పటికి బౌలింగ్ ప్రారంభించినా, మొదటి మ్యాచ్ నుంచే బరిలోకి దిగుతారని చెప్పలేం. గాయాలు, మ్యాచ్‌ల షెడ్యూల్ కారణంగా అనుకున్న బౌలింగ్ కలయికతో ఆడలేకపోతున్నామని కెప్టెన్ శుబ్‌మన్ గిల్ కూడా అసంతృప్తి వ్యక్తం చేశారు. వచ్చే 2027 వన్డే ప్రపంచకప్ ప్రణాళికల్లో ప్రసిద్ధ్ కృష్ణ కీలక భాగం కానున్నారు. కీలకమైన సమయంలో ఆయన గాయపడటం మేనేజ్‌మెంట్‌ను కలవరపెడుతోంది.
