కలం, వెబ్ డెస్క్ : ఆంధ్రప్రదేశ్లోని మార్కాపురం ప్రాంతంలో చోటుచేసుకున్న ఘోర ప్రమాదంపై ప్రధానమంత్రి మోదీ (PM Modi), రాష్ట్రపతి ద్రౌపది ముర్ము తీవ్ర దిగ్భ్రాంతి వ్యక్తం చేశారు. ఈ దుర్ఘటన అత్యంత విషాదకరమని పేర్కొంటూ, ప్రాణాలు కోల్పోయిన వారి కుటుంబాలకు తన ప్రగాఢ సానుభూతిని తెలియజేశారు. ప్రమాదంలో గాయపడిన వారు త్వరగా కోలుకోవాలని మోదీ ఆకాంక్షించారు.
బాధిత కుటుంబాలను ఆదుకునేందుకు ప్రధానమంత్రి సహాయ నిధి (PMNRF) నుండి ఆర్థిక సాయాన్ని ప్రకటించారు. ఈ ప్రమాదంలో మరణించిన వారి కుటుంబాలకు 2 లక్షల రూపాయలు, అలాగే తీవ్రంగా గాయపడిన వారికి 50,000 రూపాయల చొప్పున ఎక్స్గ్రేషియా అందించనున్నట్లు వెల్లడించారు. ప్రభుత్వ యంత్రాంగం బాధితులకు అవసరమైన అన్ని రకాల సహాయ సహకారాలను అందిస్తుందని ఈ సందర్భంగా భరోసా ఇచ్చారు.
రాష్ట్రపతి ద్రౌపది ముర్ము దిగ్భ్రాంతి..
మార్కాపురం బస్సు ప్రమాదంపై భారత రాష్ట్రపతి ద్రౌపది ముర్ము (Murmu) తీవ్ర విచారాన్ని వ్యక్తం చేశారు. ఈ దుర్ఘటనలో పలువురు ప్రాణాలు కోల్పోవడం తనను ఎంతగానో కలచివేసిందని ఆమె పేర్కొన్నారు. మరణించిన వారి కుటుంబ సభ్యులకు తన ప్రగాఢ సానుభూతిని తెలియజేస్తూ, ఈ క్లిష్ట సమయంలో వారు ధైర్యంగా ఉండాలని ఆకాంక్షించారు. ప్రమాద తీవ్రత దృష్ట్యా గాయపడిన వారు త్వరగా కోలుకోవాలని రాష్ట్రపతి ప్రార్థించారు. బాధిత కుటుంబాలకు అండగా నిలవాల్సిన అవసరాన్ని గుర్తు చేస్తూ, తన ఆలోచనలు మరియు ప్రార్థనలు ఎల్లప్పుడూ వారితోనే ఉంటాయని ఆమె తన సందేశంలో వెల్లడించారు.
