కలం, వెబ్ డెస్క్: హైదరాబాద్ లోని అత్తాపూర్ ప్రధాన రహదారిపై ఉన్న ఒక కార్ల షోరూమ్ సర్వీస్ సెంటర్లో మంగళవారం భారీ అగ్ని ప్రమాదం (Attapur fire accident) చోటుచేసుకుంది. ఈ ప్రమాదంలో షోరూమ్ లోపల ఉన్న పలు కార్లు పూర్తిగా దగ్ధమయ్యాయి. మంటలు వేగంగా వ్యాపించడంతో ఆ ప్రాంతమంతా దట్టమైన పొగ అలుముకుంది. సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తెచ్చారు.
షోరూమ్ నిర్వాహకుల అజాగ్రత్త, భద్రతా లోపాల వల్లే ఈ ప్రమాదం జరిగిందని స్థానికులు ఆరోపిస్తున్నారు. అయితే ఈ అగ్ని ప్రమాదం వెనుక కుట్ర దాగి ఉందని, ఎవరో కావాలనే ఉద్దేశపూర్వకంగా నిప్పు పెట్టారని షోరూమ్ యాజమాన్యం అనుమానం వ్యక్తం చేస్తోంది. పోలీసులు ఈ ఘటనపై కేసు నమోదు చేసి విచారణ ప్రారంభించారు. షోరూమ్ లోని సీసీ టీవీ ఫుటేజ్ ను సేకరించిన అధికారులు, ప్రమాదానికి అసలు కారణం ఏంటనే కోణంలో దర్యాప్తు చేస్తున్నారు.
