కలం, స్పోర్ట్స్ : ఫిఫా వరల్డ్ కప్ (FIFA World Cup) చరిత్రలో కొత్త రికార్డు సృష్టించే అద్భుత అవకాశం లియోనెల్ మెస్సీ (Lionel Messi) చేతులారా జారిపోయింది. ఆస్ట్రియాతో జరిగిన గ్రూప్-జే మ్యాచ్లో లభించిన పెనాల్టీని మెస్సీ గోల్గా మలచలేకపోవడంతో ప్రపంచకప్ చరిత్రలో అత్యధిక గోల్స్ చేసిన ఆటగాడిగా నిలిచే అవకాశం తృటిలో చేజారింది. అర్జెంటీనా, ఆస్ట్రియా మధ్య జరిగిన మ్యాచ్ ఆరంభంలోనే అర్జెంటీనాకు మంచి అవకాశం వచ్చింది. పెనాల్టీ బాక్స్లో లౌటారో మార్టినెజ్పై జరిగిన ఫౌల్ను రిఫరీ పరిశీలించాడు. వీఏఆర్ జోక్యంతో ఆస్ట్రియా డిఫెండర్ స్టెఫాన్ పోష్ ఫౌల్ చేసినట్లు తేలడంతో అర్జెంటీనాకు పెనాల్టీ లభించింది.
ఈ కీలక సమయంలో బంతి వద్దకు జట్టు కెప్టెన్ లియోనెల్ మెస్సీ వచ్చాడు. ఇటీవల అల్జీరియాపై హ్యాట్రిక్ సాధించిన మెస్సీ ప్రపంచకప్లో తన గోల్స్ సంఖ్యను 16కు చేర్చుకున్నాడు. దీంతో ప్రపంచకప్ చరిత్రలో అత్యధిక గోల్స్ చేసిన ఆటగాడు మిరోస్లావ్ క్లోజేతో సమంగా నిలిచాడు. ఆస్ట్రియాపై పెనాల్టీని గోల్గా మలిచి ఉంటే మెస్సీ ఒంటరిగా ప్రపంచకప్ చరిత్రలో అగ్ర గోల్ స్కోరర్గా నిలిచేవాడు. అయితే అతను తీసిన షాట్ గోల్పోస్ట్కు దూరంగా వెళ్లడంతో ఆ అవకాశం చేజారింది. అర్జెంటీనా అభిమానులకు ఇది నిరాశ కలిగించిన క్షణంగా మారింది.
మ్యాచ్ ప్రారంభమై కేవలం ఎనిమిది నిమిషాలకే ఈ ఘటన చోటుచేసుకుంది. అందువల్ల మ్యాచ్లో ఇంకా చాలాసమయం మిగిలి ఉండటంతో తన తప్పిదాన్ని సరిదిద్దుకునే అవకాశం మెస్సీకి ఉంది. జట్టుకు అవసరమైన సమయంలో గోల్ చేసి తన ముద్ర వేయాలని అతను భావిస్తున్నాడు. ఈ మ్యాచ్లో విజయం సాధిస్తే అర్జెంటీనా 2026 ఫిఫా వరల్డ్ కప్ నాకౌట్ దశకు అర్హత సాధించే అవకాశాన్ని మరింత బలపరుచుకుంటుంది.
ప్రస్తుత ఛాంపియన్గా బరిలోకి దిగిన అర్జెంటీనా, టైటిల్ను నిలబెట్టుకోవాలనే లక్ష్యంతో పోటీపడుతోంది. ఆ క్రమంలో జట్టు కెప్టెన్ మెస్సీపై అభిమానుల అంచనాలు కూడా భారీగానే ఉన్నాయి. మ్యాచ్ ప్రారంభమైన తొలి 17 నిమిషాలు ముగిసే సమయానికి ఇరు జట్లు గోల్ చేయలేకపోయాయి. స్కోరు 0-0తో సమంగా కొనసాగింది. అయితే ప్రపంచ రికార్డును అందుకునే అవకాశాన్ని కోల్పోయిన మెస్సీ, మిగిలిన సమయంలో ఎలా స్పందిస్తాడన్నది ఇప్పుడు అందరి దృష్టిని ఆకర్షిస్తోంది.
