కలం, ఖమ్మం బ్యూరో : ఆధ్యాత్మికతకు సాంకేతికత తోడైతే ఎలా ఉంటుందో చెప్పడానికి ఖమ్మంలో (Khammam) వెలసిన ఓ వినాయక మండపమే సజీవ సాక్ష్యంగా నిలుస్తోంది. సాధారణంగా వినాయక నవరాత్రి ఉత్సవాల్లో వివిధ ఆకృతుల్లో కొలువుదీరే వినాయక విగ్రహాలు, రకరకాల వెరైటీ గణపతులు భక్తులను విశేషంగా ఆకట్టుకుంటూ ఉంటాయి. కానీ, ఖమ్మం నగరంలోని రేవతి సెంటర్లో మాత్రం అందుకు భిన్నంగా ఓ వినూత్న దృశ్యం పండగ శోభకు టెక్ మెరుపులు అద్దింది. ఇక్కడ ఏర్పాటు చేసిన గణేష్ మండపంలో ఒక రోబో (Robot) నేరుగా భక్తులకు ప్రసాదాలు పంచుతూ సరికొత్త ఆకర్షణగా నిలిచింది.
సంప్రదాయ వేషధారణలో రోబో
మండపానికి వచ్చే భక్తులకు పూజారి స్థానంలో నిలబడి ప్రసాదాలు అందిస్తున్న ఈ మరమనిషి తీరు అందరినీ ఆశ్చర్యపరుస్తోంది. నెత్తిన సాంప్రదాయ తలపాగా, మెడలో కండువాతో ప్రత్యేకంగా ముస్తాబైన ఈ రోబో, అచ్చం మనుషుల మాదిరిగానే ప్రవర్తిస్తూ భక్తులకు సంతోషంగా ప్రసాదాలు పంచుతోంది. ఈ మరమనిషి చేస్తున్న సేవలను, పనులను చూసేందుకు ఖమ్మం వాసులు భారీగా మండపానికి తరలివస్తున్నారు. ప్రసాదం స్వీకరించడమే కాకుండా ఈ రోబోతో సెల్ఫీలు దిగేందుకు భక్తులు పోటీ పడుతున్నారు.
టెక్నాలజీకి ఆధ్యాత్మికత జోడింపు
ఇలాంటి ఆధునిక వింతను తమ నగరంలో గతంలో ఎప్పుడూ చూడలేదని స్థానికులు ఆనందం వ్యక్తం చేస్తున్నారు. టెక్నాలజీని ఆధ్యాత్మిక ఉత్సవాలకు అనుసంధానించిన తీరు పట్ల సర్వత్రా ప్రశంసలు వ్యక్తమవుతున్నాయి. ఖమ్మంలో కనిపిస్తున్న ఈ రోబో కోలాహలాన్ని చూస్తుంటే, రాబోయే రోజుల్లో ఇతర పట్టణాల్లోని గణేష్ మండపాల్లోనూ ఇలాంటి సాంకేతిక ప్రయోగాలు మరిన్ని వెలిసే అవకాశం ఉందని విశ్లేషకులు భావిస్తున్నారు.
