కలం డెస్క్ : ప్రస్తుతం రాష్ట్ర రాజకీయాల్లో వాక్యూమ్ (శూన్యత) ఉన్నదని, తాను స్వంతంగా ఒక రాజకీయ పార్టీని పెట్టడంపై ఇంకా నిర్ణయం తీసుకోలేదని ఎమ్మెల్సీ కల్వకుంట్ల కవిత(Kavitha) అన్నారు. జనం బాట పేరుతో తెలంగాణ జాగృతి తరఫున జిల్లాల పర్యటన చేస్తున్నానని, రాజకీయ పార్టీ పెట్టాలంటూ ఎక్కువగా మహిళల నుంచే ఒత్తిడి వస్తున్నదన్నారు. “కొత్త పార్టీ పెట్టేదేమున్నది?.. ఎప్పుడైనా పెట్టొచ్చు… నిజానికి ఇప్పుడున్న పరిస్థితుల్లో ప్రజల గొంతుకగా ఉండేలా కొత్త పార్టీ రావాల్సిన అవసరం ఉన్నది.. అలాంటి వాక్యూమ్ కూడా ఉన్నది… కొత్త పార్టీ ఏదైనా ప్రజల సమస్యలను తీర్చేలా ఉండాలి… వారి ఇబ్బందులకు పరిష్కారం చూపేదిగా మారాలి…” అని కల్వకుంట్ల కవిత మీడియాతో చిట్‌చాట్ సందర్భంగా అన్నారు. “పార్టీని ప్రకటించే సమయం, సందర్భం కోసం ఎదురు చూస్తున్నా… పార్టీని పెట్టడం పెద్ద సమస్య కాదు… కానీ అది నిలదొక్కుకోవాలి… తెలంగాణలో మరో ప్రాంతీయ పార్టీకి స్కోప్ ఉంది… బీఆర్ఎస్ పార్టీకి ఆల్టర్నేట్ అవసరం ఉంది..” అని అన్నారు.
ప్రజల సమస్యలను కలెక్టర్లకు ఇస్తాం :
తెలంగాణ జాగృతి(Telangana Jagruthi) తరఫున తాను చేపట్టిన జనం బాట కార్యక్రమంలో ప్రజల నుంచి మంచి స్పందన వస్తున్నదని, గత ప్రభుత్వమే కాక ఇప్పటి ప్రభుత్వ వైఫల్యాలను కూడా ప్రజలు ఎత్తి చూపుతున్నారని కవిత గుర్తుచేశారు. ఇప్పటివరకు తిరిగిన జిల్లాల్లో ప్రజలు లేవనెత్తిన సమస్యలు, అంశాలను ప్రతి ఐదు జిల్లాలకు ఒకటి చొప్పున రిపోర్టు తయారు చేస్తున్నామన్నారు. ఈ రిపోర్టులను ఆయా జిల్లాల కలెక్టర్లకు పంపుతామన్నారు. జనం దగ్గరికి వెళ్ళినప్పుడే ప్రజల సమస్యలు తెలుస్తాయని, గ్రౌండ్‌లో ఏం జరుగుతున్నదో అర్థమవుతుందన్నారు. ఇప్పటిదాకా తాను చేపట్టిన జనం బాటలో పన్నెండు ప్రధాన సమస్యలను గుర్తించినట్లు తెలిపారు. ప్రధాన సమస్య ప్రభుత్వ ఆసుపత్రులేనని అన్నారు. రేవంత్ రెడ్డి ప్రభుత్వాన్ని తిట్టని వారు లేరన్నారు. కనీసం రోడ్లపైన గుంతలను కూడా పూడ్చలేని ప్రభుత్వమని విమర్శించారు.
ప్రధాన ప్రతిపక్షం నిద్రపోతున్నది :
ప్రజల సమస్యలను టేకప్ చేసి ప్రభుత్వంతో పోరాడి పరిష్కారం కోసం పనిచేయాల్సిన ప్రధాన ప్రతిపక్షం ఆ పని చెయ్యడం లేదని, బీఆర్ఎస్ నేతలు నిద్రపోతున్నారని కల్వకుంట్ల కవిత(Kavitha) ఆరోపించారు. ప్రజల నుంచి వచ్చిన ఫీడ్‌బ్యాక్ ఆధారంగానే తాను ఈ ఆరోపణలు చేస్తున్నట్లు తెలిపారు. హైదరాబాద్‌లోని చెరువులు కబ్జా అవుతుంటే హైడ్రా కమిషనర్‌కు తామే కంప్లైంట్ చేశామని గుర్తుచేశారు. ఇందిరమ్మ ఇళ్ల స్కీమ్‌లో గోల్‌మాల్ జరుగుతున్నదని, ఒక్కో ఇంటికి సగటున రూ. 50 వేల నుండి రూ. 1 లక్ష వరకు కాంగ్రెస్ నాయకులు వసూలు చేస్తున్నారంటూ ప్రజలే తనకు చెప్తున్నారని అన్నారు. రాష్ట్ర సర్కార్ పూర్తిగా అవినీతిలో మునిగిపోయిందన్నారు. గత ప్రభుత్వమేమో డబుల్ బెడ్ రూం ఇళ్లను నిర్మించి ఇవ్వకుండానే వదిలేసి వెళ్ళిపోయిందని, ఇప్పటి ప్రభుత్వమేమో ఇందిరమ్మ ఇండ్ల పేరుతో వసూళ్ళ పర్వాన్ని నడుపుతున్నదన్నారు.
Read Also: నేనూ వెబ్‌సైట్‌లో ఫ్రీ మూవీస్ చూశా : కవిత
Follow Us on : Pinterest
 ఉన్నదని, తాను స్వంతంగా ఒక రాజకీయ పార్టీని పెట్టడంపై){kind=link}