కలం, స్పోర్ట్స్ : భారత్ నుంచి UFCలో అడుగుపెట్టాలన్న కలకు చున్గ్రెంగ్ కోరెన్ (Chungthrang Koren) మరో అడుగు దూరంలో ఉన్నాడు. షాంఘై వేదికగా ఆగస్టు 28న జరిగే రోడ్ టు UFC సీజన్-5 సెమీఫైనల్లో జపాన్ ఫైటర్ రియో తజిమాతో తలపడనున్నాడు. ఈసారి కోరెన్ పూర్తిగా సిద్ధమయ్యాడు. బరువు సమస్య లేదు. షార్ట్ నోటీసు లేదు. మూడు నెలల పాటు ఇంటి వద్ద విశ్రాంతి తీసుకున్న తర్వాత పూర్తి స్థాయిలో శిక్షణ తీసుకున్నాడు. మేలో జరిగిన క్వార్టర్ఫైనల్ మాత్రం పూర్తిగా భిన్నంగా సాగింది. చివరి నిమిషంలో అవకాశం రావడంతో కోరెన్ బరిలోకి దిగాడు. బరువు తగ్గేందుకు సరైన సమయం లేకపోవడంతో సౌనా ద్వారా బరువు తగ్గేందుకు ప్రయత్నించాడు.
అయినా పంజరంలో మాత్రం అదరగొట్టాడు. అప్పటివరకు ఓటమి ఎరుగని జపాన్ ఫైటర్ ర్యూహో మియాగుచీని రెండో రౌండ్లో ఓడించాడు. ఎడమ చేతి పంచ్తో అతడిని కిందపడేసి, ఆ తర్వాత రియర్-నేకెడ్ చోక్తో పోరును ముగించాడు. అంతకుముందు కోరెన్ కెరీర్లో మరో పెద్ద దెబ్బ తగిలింది. 2025 ఆగస్టులో నేపాల్కు చెందిన రవీంద్ర ధంత్ చేతిలో MFN బాంటమ్వెయిట్ టైటిల్ కోల్పోయాడు. ఆ ఓటమి తర్వాత కోరెన్ తీవ్ర నిరాశకు గురయ్యాడు. శిక్షణకు దూరమయ్యాడు. ఆహార నియమాలు కూడా పాటించలేదు. దీంతో శారీరకంగా, మానసికంగా వెనుకబడ్డాడు.
అక్కడి నుంచే తిరిగి మొదలుపెట్టాడు. డిసిప్లిన్పై దృష్టి పెట్టాడు. ఆరోగ్యకరమైన ఆహారం తీసుకుంటూ శరీరాన్ని సిద్ధం చేసుకున్నాడు. దాని ఫలితం ఇప్పుడు కనిపిస్తోంది. గత పోరులో సుమారు 71 కిలోల బరువుతో ఉన్న కోరెన్.. ప్రస్తుతం 66 నుంచి 67 కిలోలకు చేరుకున్నాడు. తన ఆటలోనూ మార్పులు చేశాడు. ధంత్తో ఓటమి తర్వాత దగెస్తాన్ వెళ్లి రెజ్లర్లు, స్ట్రైకర్లు, UFC ఫైటర్లతో శిక్షణ తీసుకున్నాడు. ఇటీవల ఫుకెట్లోనూ శిక్షణ పొందాడు. తన స్ట్రైకింగ్ బాగా మెరుగుపడిందని కోరెన్ భావిస్తున్నాడు. మియాగుచీపై విజయంలో అది కనిపించింది కూడా.
కానీ ఇప్పుడు ఎదురుగా ఉన్న తజిమా మరింత కఠినమైన ప్రత్యర్థి. అతడి రికార్డు 11-3. మేలో చైనాకు చెందిన టి హైటావోను ఓడించి సెమీఫైనల్కు చేరుకున్నాడు. తజిమాకు అనుభవం ఎక్కువ. రీచ్ కూడా ఎక్కువ. అందుకే అతడి ఆటను కోరెన్ ప్రత్యేకంగా అధ్యయనం చేశాడు. తజిమాపై తన ప్రధాన ఆయుధం టేక్డౌన్ అని కోరెన్ భావిస్తున్నాడు. రీచ్లో తేడాను గ్రౌండ్ గేమ్తో అధిగమించాలనుకుంటున్నాడు. ఈ పోరులో గెలిస్తే కోరెన్ రోడ్ టు UFC ఫైనల్కు చేరుకుంటాడు. అక్కడ విజయం సాధిస్తే UFC కాంట్రాక్ట్కు అతడి కల మరింత దగ్గరవుతుంది.
మరోవైపు, మరో సెమీఫైనల్లో రవీంద్ర ధంత్ న్యూజిలాండ్కు చెందిన అజేయ ఫైటర్ కాసిబ్ మర్డాక్తో తలపడనున్నాడు. ధంత్ గెలిస్తే కోరెన్తో మరోసారి పోరుకు అవకాశం ఉంటుంది. అయితే దాని గురించి ఇప్పుడు ఆలోచించడం లేదని కోరెన్ స్పష్టం చేశాడు. ముందుగా తజిమాపై గెలవడమే తన లక్ష్యంగా పెట్టుకున్నాడు. ఈ పోరును కోరెన్ తన కోసం మాత్రమే చూడటం లేదు. తన కుటుంబంతో పాటు దేశం కోసం కూడా పోరాడుతున్నానని భావిస్తున్నాడు.
భారత్లో MMA మరింత ఎదగాలంటే ప్రొఫెషనల్ టోర్నమెంట్లు క్రమం తప్పకుండా జరగాలని కోరెన్ అభిప్రాయపడ్డాడు. ఎక్కువ పోటీ ఉంటే మరింత మంది ప్రతిభావంతులైన ఫైటర్లు బయటకు వస్తారని చెబుతున్నాడు. ఇక యువ ఫైటర్లకు కోరెన్ ఇచ్చే సందేశం ఒక్కటే. ఓటములు వచ్చినా వదులుకోవద్దని అంటున్నాడు. అయితే MMAలో ముందుకు రావాలంటే త్యాగం, క్రమశిక్షణ, పూర్తి అంకితభావం అవసరమని తన అనుభవంతో చెబుతున్నాడు. ఇప్పుడు అతడి ముందు ఒక్క లక్ష్యమే ఉంది. ఒక్క ప్రత్యర్థే కనిపిస్తున్నాడు.
