కలం, స్పోర్ట్స్ : ఆసియా క్రీడల్లో చోటు దక్కలేదు.. అయినా లక్ష్యం మారలేదు. భారత స్టార్ కాంపౌండ్ ఆర్చర్ అభిషేక్ వర్మ(Abhishek Verma) 2028 లాస్ ఏంజెల్స్ ఒలింపిక్స్‌లో పాల్గొనాలని పట్టుదలతో ఉన్నారు. 2030 కామన్వెల్త్ గేమ్స్‌పైనా గురిపెట్టారు. జాతీయ జట్టులోకి తిరిగి రావడమే లక్ష్యంగా సాధన కొనసాగిస్తున్నారు. 37 ఏళ్ల అభిషేక్ వర్మకు ఆసియా క్రీడల్లో చోటు దక్కకపోవడం నిరాశ కలిగించింది. అయితే, తాను మార్గదర్శనం చేసిన యువ ఆర్చర్లు అద్భుతంగా రాణించడం సంతోషాన్నిచ్చిందని తెలిపారు. ఆసియా క్రీడల్లో భారత్ కాంపౌండ్ ఆర్చరీ మిక్స్‌డ్ టీమ్ విభాగంలో ఒలింపిక్ కోటా సాధించింది. పురుషులు, మహిళల టీమ్ విభాగాల్లోనూ స్వర్ణాలు గెలిచింది.
ఒలింపిక్స్‌కు అర్హత సాధించే ఒత్తిడి తగ్గడంతో ఇక పూర్తి స్థాయిలో సన్నద్ధతపై దృష్టి పెట్టవచ్చని అభిషేక్ అభిప్రాయపడ్డారు. భారత్ ఆర్చరీలో రెండు లేదా మూడు పతకాలు సాధించే అవకాశం ఉందని ఆశాభావం వ్యక్తం చేశారు. జాతీయ ర్యాంకింగ్ టోర్నీల్లో తన స్కోర్లు మెరుగ్గానే ఉన్నాయని, వాటిని విజయాలుగా మార్చుకునేందుకు మరింత కృషి చేస్తానని తెలిపారు.
రాబోయే ఎంపిక ట్రయల్స్‌లో తన ప్రదర్శనతో జట్టులోకి తిరిగి రావాలని లక్ష్యంగా పెట్టుకున్నారు. యువ ఆర్చర్లకు మార్గదర్శనం చేయడాన్ని కూడా అభిషేక్ కొనసాగిస్తున్నారు. ముఖ్యంగా మిక్స్‌డ్ టీమ్ ఎంపికల్లో ఆటగాళ్ల మధ్య సమన్వయం, మ్యాచ్‌ల్లో ప్రదర్శనకు ప్రాధాన్యం ఇవ్వాలని సూచించారు. ఒలింపిక్స్‌కు ముందు జోడీలకు కలిసి ఆడే అవకాశం కల్పించాలని, బలమైన రిజర్వ్ ఆటగాళ్ల బృందాన్ని కూడా సిద్ధం చేయాలని అభిప్రాయపడ్డారు.
