కలం, స్పోర్ట్స్: ఇరాన్పై వరుసగా రెండు విజయాలు.. కబడ్డీలో భారత్ గోల్డెన్ డబుల్ (Kabaddi Golden Double) సాధించింది. ఏషియన్ గేమ్స్ 2026లో పురుషుల జట్టు ఇరాన్ను 40-34తో ఓడించి స్వర్ణం గెలిచింది. దీంతో గత ఏషియన్ గేమ్స్లో సాధించిన టైటిల్ను భారత్ నిలబెట్టుకుంది. పురుషుల ఫైనల్ ఆరంభం నుంచే హోరాహోరీగా సాగింది.
తొలి ఎనిమిది నిమిషాల తర్వాత స్కోరు 5-5గా ఉంది. ఆ తర్వాత భారత్ 12-9తో ముందంజ వేసింది. అయితే ఇరాన్ వెంటనే పుంజుకుంది. తొలి అర్ధభాగం ముగిసే సమయానికి ఇరాన్ 18-17తో ఆధిక్యంలో నిలిచింది. రెండో అర్ధభాగంలోనూ ఇరాన్(Iran) ఆధిక్యాన్ని 20-17కు పెంచింది. భారత్ కీలక ట్యాకిల్తో అంతరాన్ని తగ్గించింది. ఆ తర్వాత 21-20తో మళ్లీ ఆధిక్యంలోకి వచ్చింది.
ఇరాన్ 21-21తో స్కోరును సమం చేసింది. అక్కడి నుంచి భారత్ ఆధిక్యం పెంచుకుంది. 24-21తో ముందుకు వెళ్లింది. ఇరాన్ రెండు పాయింట్లు సాధించి 24-23కు తీసుకొచ్చింది. అయితే కీలక సమయంలో భారత్ ఆల్అవుట్ సాధించింది. దీంతో 29-24తో ఐదు పాయింట్ల ఆధిక్యం లభించింది. ఆ తర్వాత భారత డిఫెన్స్ ఒత్తిడిని తట్టుకుంది. ఇరాన్ తిరిగి రావడానికి ప్రయత్నించినా భారత్ ఆధిక్యాన్ని కాపాడుకుంది.
చివరికి 40-34తో మ్యాచ్ను ముగించింది. ఈ విజయంతో ఏషియన్ గేమ్స్లో భారత్ పురుషుల కబడ్డీలో తొమ్మిదో స్వర్ణం సాధించింది. అంతేకాదు.. ఈ గేమ్స్లో భారత్కు ఇది నాలుగో స్వర్ణ పతకంగా నిలిచింది. అంతకుముందు మహిళల జట్టు కూడా ఇరాన్పై 37-34తో గెలిచింది. దీంతో మహిళల జట్టు కూడా తమ టైటిల్ను నిలబెట్టుకుంది. ఒకే రోజు పురుషుల, మహిళల జట్లు ఇరాన్ను ఓడించి స్వర్ణాలు సాధించడంతో కబడ్డీలో భారత్ గోల్డెన్ డబుల్ పూర్తి చేసింది.
