కలం, స్పోర్ట్స్: న్యూజిలాండ్ (New Zealand)తో జరిగిన ఐదో వన్డేలో భారత (India) జట్టు 22 పరుగుల తేడాతో విజయం సాధించింది. దీంతో ఐదు మ్యాచ్ల వన్డే సిరీస్ను 3-1తో కైవసం చేసుకుంది. తొలుత బ్యాటింగ్ చేసిన భారత్ 42.1 ఓవర్లలో 209 పరుగులకు ఆలౌటైంది. లక్ష్య ఛేదనలో న్యూజిలాండ్ 48.1 ఓవర్లలో 187 పరుగులకే కుప్పకూలింది. భారత బౌలర్లలో అర్ష్దీప్ సింగ్ మూడు వికెట్లతో రాణించగా.. మహమ్మద్ సిరాజ్, అక్షర్ పటేల్ చెరో రెండు వికెట్లు తీశారు.
టాస్ గెలిచిన న్యూజిలాండ్ తొలుత బౌలింగ్ ఎంచుకుంది. బ్యాటింగ్కు దిగిన భారత్కు ఆరంభంలోనే ఎదురుదెబ్బలు తగిలాయి. రోహిత్ శర్మ 7, విరాట్ కోహ్లీ 5, రుతురాజ్ గైక్వాడ్ 18 పరుగులు చేసి అవుటయ్యారు. కెప్టెన్ శ్రేయస్ అయ్యర్ 22 పరుగులు చేశాడు. అక్షర్ పటేల్, ఇషాన్ కిషన్ చెరో 46 పరుగులతో జట్టును ఆదుకున్నారు. నామన్ ధీర్ 22 పరుగులు జోడించాడు. చివర్లో సిరాజ్ 14, అర్ష్దీప్ 14 పరుగులు చేయడంతో భారత్ 209 పరుగులు చేసింది. కివీస్ బౌలర్లలో సాంట్నర్, డఫీ మూడేసి వికెట్లు తీశారు.
210 పరుగుల లక్ష్యంతో బరిలోకి దిగిన న్యూజిలాండ్ ఆరంభంలో పోటీనిచ్చింది. విల్ యంగ్ 22, నిక్ కెల్లీ 24 పరుగులు చేశారు. డీన్ ఫాక్స్క్రాఫ్ట్ 31 పరుగులతో టాప్ స్కోరర్గా నిలిచాడు. మైకేల్ బ్రేస్వెల్ 19, మిచెల్ సాంట్నర్ 24 పరుగులు చేశారు. అయితే భారత బౌలర్లు క్రమం తప్పకుండా వికెట్లు తీసి కివీస్ను ఒత్తిడిలోకి నెట్టారు. అర్ష్దీప్ మూడు వికెట్లు పడగొట్టగా.. సిరాజ్, అక్షర్ చెరో రెండు వికెట్లు తీశారు. దీంతో న్యూజిలాండ్ 187 పరుగులకే ఆలౌటైంది. దీంతో సిరీస్ భారత్ సొంతమైంది.

