ఛాన్స్ మిస్సయినా తగ్గేదేలే అంటున్న సూర్యకుమార్!

కలం, స్పోర్ట్స్: భారత టీ20 జట్టులో చోటు కోల్పోయిన స్టార్ బ్యాటర్ సూర్యకుమార్ యాదవ్ (Suryakumar Yadav) తన బ్యాట్‌తో సెలక్టర్లకు గట్టి సందేశం పంపుతున్నాడు. సయ్యద్ ముస్తాక్ అలీ ట్రోఫీలో భాగంగా సోమవారం గుజరాత్‌తో జరిగిన మ్యాచ్‌లో సూర్య మరోసారి తన అద్భుత ఫామ్‌ను నిరూపించుకున్నాడు. కేవలం 29 బంతుల్లోనే 82 పరుగులు చేసి ముంబైకి ఘనవిజయాన్ని అందించాడు.

ఈ టోర్నీ ప్రారంభ మ్యాచ్‌లోనూ హైదరాబాద్‌పై 21 బంతుల్లో 60 పరుగులు చేసిన సూర్య, తాజాగా గుజరాత్ బౌలర్లపై మరింత తీవ్రంగా విరుచుకుపడ్డాడు. తన ఇన్నింగ్స్‌లో ఏడు సిక్సర్లు, తొమ్మిది ఫోర్లు బాది స్టేడియాన్ని హోరెత్తించాడు. టీమిండియాలో అవకాశాలు చేజారినప్పటికీ, ఆటపై తన పట్టును కోల్పోలేదని ఈ ప్రదర్శనతో నిరూపించాడు.

మరోవైపు, గుజరాత్ జట్టు తొలుత బ్యాటింగ్ చేసి 197 పరుగుల భారీ స్కోరు సాధించినా, సూర్యకుమార్ మెరుపు బ్యాటింగ్ ముందు ఆ జట్టు బౌలింగ్ నిలవలేకపోయింది. అతడికి సర్ఫరాజ్ ఖాన్ (40 పరుగులు) కూడా తోడవడంతో ముంబై కేవలం 15.4 ఓవర్లలోనే లక్ష్యాన్ని సులువుగా ఛేదించింది. వరుస ఇన్నింగ్స్‌లతో అదరగొడుతున్న సూర్యకుమార్ యాదవ్ ప్రదర్శన ప్రస్తుతం క్రికెట్ వర్గాల్లో చర్చనీయాంశంగా మారింది. దేశవాళీ టోర్నీల్లో ఈ స్థాయిలో రాణిస్తున్న సూర్య, త్వరలోనే మళ్లీ జాతీయ జట్టులోకి పునరాగమనం చేయడానికి తీవ్రంగా ప్రయత్నిస్తున్నట్లు స్పష్టమవుతోంది.

మ‌రిన్ని వార్త‌ల కోసం మా వాట్స‌ప్ ఛాన‌ల్ ఫాలో అవ్వండి

లేటెస్ట్ న్యూస్‌

Read More Latest News >>

ఎక్స్‌క్లూజివ్‌

Read More Exclusive Stories >>