కలం, వెబ్ డెస్క్: బీఆర్ఎస్ పార్టీపై, మాజీ సీఎం కేసీఆర్‌పై సీఎం రేవంత్ రెడ్డి అసెంబ్లీలో చేసిన వ్యాఖ్యలపై ఆ పార్టీ మాజీ మంత్రి, ఎమ్మెల్యే హరీశ్ రావు (Harish Rao) తీవ్ర స్థాయిలో స్పందించారు. అసెంబ్లీలో సీఎం రేవంత్ రెడ్డి చెప్పినవన్నీ అబద్ధాలేనని కొట్టిపారేశారు. ప్రభుత్వ హామీలపై ప్రశ్నిస్తుంటే డైవర్షన్ పాలిటిక్స్ చేస్తున్నారని మండిపడ్డారు. తాము సభలో ఉంటే తమ ప్రభుత్వ స్కాములను చెబుతామనే.. తమను సభ నుంచి సస్పెండ్ చేశారని అన్నారు. ఈ మేరకు తెలంగాణ భవన్ లో ఏర్పాటు చేసిన మీడియా సమావేశంలో మాట్లాడారు.
బీఆర్ఎస్‌ను ఎదుర్కొనే సత్తా కాంగ్రెస్ ప్రభుత్వానికి లేదని హరీశ్ రావు (Harish Rao) మండిపడ్డారు. అసెంబ్లీ నుంచి తాము పారిపోలేదని.. ప్లాన్ ప్రకారమే తమ సభ్యులను బయటకు పంపించారని ఆరోపించారు. తమపై ఎదురుదాడి తప్పితే.. ఈ మూడేళ్ళలో రేవంత్ సర్కార్ చేసిందేంటి? అని ప్రశ్నించారు. ఆరు గ్యారంటీలపై తాము ప్రశ్నిస్తుంటే.. తమపై బురద జల్లుతున్నారని విమర్శించారు.
రాహుల్ వస్తే ఒప్పు.. మేం వస్తే తప్పా?
రాహుల్ గాంధీ లోక్ సభకు టీ షర్ట్, స్టిక్కర్లు వేసుకుని వెళితే ఒప్పు కానీ, బీఆర్ఎస్ ఎమ్మెల్యేలు టీ షర్ట్ వేసుకుని వస్తే తప్పా? అని హరీశ్ రావు నిలదీశారు. లోక్ సభ నియమాలు, అసెంబ్లీ నియమాలు వేరుగా ఉన్నాయా? అని ప్రశ్నించారు. తాము సభలో ఉంటే మీ కుంభకోణాలు, మీ కుటుంబ అవినీతి బయటపడుతుందనే భయంతోనే మొత్తం సెషన్ కి మమ్మల్ని సస్పెండ్ చేశారని అన్నారు. సస్పెన్షన్ ఎత్తివేస్తే ఆధారాలతో సభకు వస్తామని తమ ఎమ్మెల్యేలు సవాల్ చేశారని చెప్పారు. కమ్యూనిస్ట్, బీజేపీ పార్టీలు అడిగినా.. సస్పెన్షన్ ఎత్తేసే దమ్ము ముఖ్యమంత్రికి లేదని దుయ్యబట్టారు.
రేవంత్ రెడ్డే ఒప్పుకున్నారు..
రాష్ట్రంలో తీవ్ర చర్చనీయాంశంగా మారిన 22A నిషేధిత భూములపై బీఆర్ఎస్ చేసిన ఆరోపణలు అక్షర సత్యమని సీఎం రేవంత్ రెడ్డి అసెంబ్లీలో ఒప్పుకున్నారని హరీశ్ రావు చెప్పారు. 22ఏ భూములతో ప్రజలు ఇబ్బందులు పడుతున్నారని అసెంబ్లీలో రేవంత్ రెడ్డి మాటలతోనే తేలిందన్నారు. 3 లక్షల 71 వేల ఎకరాలు నిషేధిత జాబితాలో పెడితే.. అది 30 లక్షల ఎకరాలకు పెరిగిందని స్వయంగా ముఖ్యమంత్రే చెప్పారని తెలిపారు. దీనివల్ల ఎన్ని లక్షల కుటుంబాలు ఇబ్బందులు పడ్డాయో సీఎం సమాధానం చెప్పాలని డిమాండ్ చేశారు. కలెక్టర్లు దబా దబా సంతకాలు పెట్టి అప్లోడ్ చేశారని సీఎం అంటున్నారని.. తప్పు చేసిన అధికారులపై ఎందుకు చర్యలు తీసుకోలేదని ప్రశ్నించారు.
పొంగులేటి, రేవంత్ రెడ్డి.. ఎవరిది నిజం?
కాంగ్రెస్ పాలనలో ఒక్క ఎకరా కూడా నిషేధిత జాబితాలో పెట్టలేదని మంత్రి పొంగులేటి అన్నారని.. ఇప్పుడు స్వయంగా అసెంబ్లీలోనే అధికారులే 30 లక్షల ఎకరాలు అప్లోడ్ చేశారని ముఖ్యమంత్రి చెబుతున్నారని.. ఇందులో ఎవరిది నిజం? అని ప్రశ్నించారు. సీఎం రేవంత్ రెడ్డి ఇల్లు రాత్రికి రాత్రి నిషేధిత జాబితా నుంచి ఎలా తొలగించారో, అదే విధంగా ప్రజల ఆస్తులను కూడా 22A నుంచి తొలగించాలని డిమాండ్ చేశారు. చట్టం సామాన్యుడికైనా, ముఖ్యమంత్రికైనా ఒకేలా ఉండాలన్నారు. 2023 డిసెంబర్ 7 నుంచి ఇప్పటి వరకు ఎన్ని భూములు నిషేధిత జాబితాలో పెట్టారు, ఎన్ని తొలగించారు అనే దానిపై శ్వేతపత్రం విడుదల చేయాలన్నారు. 22A వ్యవహారంపై సిట్టింగ్ జడ్జితో విచారణ జరిపించాలని డిమాండ్ చేశారు.
Also Read : గోల్డ్ డిఫెండ్‌కి భారత్ రెడీ.. కెప్టెన్ పుష్ప రాణా
Follow Us On: X(Twitter)
