కలం, స్పోర్ట్స్ : భారత సీనియర్ ఆల్రౌండర్ హార్దిక్ పాండ్యా (Hardik Pandya)కు మళ్లీ గాయమైంది. ఆయన కుడి మోకాలి కింది భాగంలో తీవ్రమైన నొప్పితో బాధపడుతున్నారు. దీంతో ఆయన కనీసం మూడు వారాల పాటు క్రికెట్కు దూరంగా ఉండనున్నారు. ఈ క్రమంలో త్వరలో జరగబోయే న్యూజిలాండ్ పర్యటనకు కూడా ఆయన అందుబాటులో ఉండటం లేదు. ఈ గాయం వల్ల అక్టోబర్ 6 నుంచి ప్రారంభమయ్యే ఆస్ట్రేలియా ‘ఎ’ సిరీస్కు కూడా ఆయన దూరమయ్యారు. నిజానికి సెప్టెంబర్ 20 కల్లా కోలుకుంటారని భావించి సెలక్టర్లు ఆయనను భారత్ ‘ఎ’ జట్టుకు ఎంపిక చేశారు. కానీ తాజా స్కాన్ నివేదికల్లో గాయం తీవ్రత బయటపడింది.
వైద్యుల సూచన మేరకు హార్దిక్ రెండు వారాల పాటు పూర్తి విశ్రాంతి తీసుకోనున్నారు. బీసీసీఐ వైద్య విభాగం హెడ్ డాక్టర్ దిన్షా పార్దివాలా జపాన్ నుంచి రాగానే ఆయనను పరిశీలిస్తారు. ఆ తర్వాతే పునరావాస శిక్షణ ఎప్పుడు ప్రారంభించాలనేది నిర్ణయిస్తారు.ఆసియా క్రీడల కోసం ఆయన పాస్పోర్ట్ను కూడా అధికారులు తీసుకున్నారు. అయితే అఫ్గానిస్థాన్ సిరీస్ ముందు ఫీల్డింగ్ సాధన చేస్తుండగా ఆయనకు తీవ్రమైన నొప్పి వచ్చింది. ఫిట్నెస్ సర్టిఫికేట్ తీసుకునే సమయంలో నొప్పి మళ్లీ తిరగబెట్టింది.
ఐపీఎల్ ముగిసినప్పటి నుంచి హార్దిక్ బెంగళూరులోని సెంటర్ ఆఫ్ ఎక్సలెన్స్లోనే శిక్షణ పొందుతున్నారు. గత నాలుగు నెలల్లో ఆయన గాయపడటం ఇది మూడోసారి. దీంతో ఆయన పునరాగమనం మరింత ఆలస్యమవుతోంది.న్యూజిలాండ్ సిరీస్ దూరమవ్వడంతో హార్దిక్ తర్వాత జింబాబ్వే సిరీస్ లేదా దేశవాళీ టోర్నీల ద్వారానే మైదానంలోకి అడుగుపెట్టాల్సి ఉంటుంది.
విజయ్ హజారే లేదా సయ్యద్ ముస్తాక్ అలీ ట్రోఫీలలో ఆడి ఆయన తన ఫిట్నెస్ను నిరూపించుకోవాల్సి ఉంది. హార్దిక్ పాండ్యా త్వరగా కోలుకుని మళ్లీ ఫామ్లోకి రావాలని అభిమానులు కోరుకుంటున్నారు. ఆయన రీఎంట్రీపై బీసీసీఐ వైద్య బృందం త్వరలోనే స్పష్టత ఇచ్చే అవకాశం ఉంది.
