కలం, ఖమ్మం బ్యూరో : మద్యం మహమ్మారి కన్న బంధాలను సైతం బలితీసుకుంటోంది. మద్యం మత్తులో విచక్షణ కోల్పోయిన ఓ తండ్రి.. తన కన్నకొడుకని కూడా చూడకుండా దారుణంగా కొట్టి చంపిన ఘటన ఖమ్మం జిల్లా కల్లూరు (Kalluru ) మండల కేంద్రంలో తీవ్ర కలకలం రేపింది.
పోలీసుల కథనం ప్రకారం… కల్లూరు మండలంలోని అంబేద్కర్ నగర్కు చెందిన కొత్తపల్లి సీతారాములు ఆటో డ్రైవర్గా పనిచేస్తూ జీవనం సాగిస్తున్నాడు. అతనికి మద్యం తాగే అలవాటు ఉంది. ఈ క్రమంలోనే మద్యం మత్తులో ఉన్న సీతారాములుకు, అతని కుమారుడు కిరణ్ కుమార్ (30)కు మధ్య ఘర్షణ తలెత్తింది. మాటమాట పెరగడంతో తీవ్ర ఆగ్రహానికి లోనైన తండ్రి సీతారాములు.. కన్నకొడుకనే జాలి కూడా లేకుండా కిరణ్ కుమార్ పై దాడికి తెగబడ్డాడు. కిరణ్ తలపై బలంగా కొట్టాడు. ఆ దెబ్బకు తలకు తీవ్ర గాయమై, రక్తం మడుగులో మునిగిపోయిన కిరణ్ కుమార్ అక్కడికక్కడే ప్రాణాలు విడిచాడు.
కొడుకు కిందపడిపోవడంతో కంగారుపడ్డ నిందితుడు సీతారాములు.. వెంటనే తన ఆటోను తీసుకుని ఘటనా స్థలం నుండి పరారయ్యాడు. మృతుడు కిరణ్ కుమార్కు భార్య, ఇద్దరు పిల్లలు ఉన్నారు. చేతికొచ్చిన కొడుకు కళ్లముందే శవమై పడి ఉండటం, సంపాదించే వ్యక్తి దూరమవడంతో ఆ కుటుంబం కన్నీరుమున్నీరవుతోంది. కుటుంబ సభ్యుల రోదనలు స్థానికులను తీవ్రంగా కలచివేశాయి.
ఘటనా స్థలానికి చేరుకున్న కల్లూరు పోలీసులు మృతదేహాన్ని స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు. ఈ మేరకు కేసు నమోదు చేసుకుని, పరారీలో ఉన్న నిందితుడు కొత్తపల్లి సీతారాములు కోసం గాలింపు చర్యలు ముమ్మరం చేశారు.
