కలం, వెబ్ డెస్క్ : ఒక యువకుడు, ఒక మహిళ ప్రేమించి పారిపోయారనే కోపంతో, సదరు యువకుడి తండ్రిపై మహిళా బంధువులు అమానుషంగా దాడి చేసి బలవంతంగా మూత్రం తాగించారు. మధ్యప్రదేశ్ (Madhya Pradesh)లోని రైసెన్ జిల్లాలో ఈ ఘటన చోటు చేసుకున్నది. రైసెన్ జిల్లాలోని అగారియా మార్ఖో గ్రామానికి చెందిన బిహారీ బంజారా (70) కొడుకు, పొరుగున ఉన్న విదిశ జిల్లాలోని శంషాబాద్కు చెందిన ఒక మహిళతో కలిసి కొన్ని రోజుల కింద పారిపోయాడు. ఈ విషయంపై ఆగ్రహంతో ఉన్న మహిళా బంధువులు ఆ యువకుడి కుటుంబంపై పగ పెంచుకున్నారు. దాదాపు 10 నుంచి 12 మంది వ్యక్తులు ఆయుధాలతో బిహారీ బంజారా ఇంటిపై దాడి చేశారు.
ఆ సమయంలో ఇంట్లో ఉన్న బంజారా, అతని భార్యను తీవ్రంగా కొట్టారు. అనంతరం మహిళ ఎక్కడ ఉందో చెప్పాలని డిమాండ్ చేస్తూ, 70 ఏళ్ల ఆ వృద్ధుడిని బలవంతంగా వాహనంలో ఎక్కించుకుని సుమారు 150 కిలోమీటర్ల దూరంలో ఉన్న రాజ్గఢ్ జిల్లాలోని బియోరా పట్టణానికి తీసుకెళ్లారు. అక్కడ ఒక నిర్జన ప్రదేశంలో అతన్ని కట్టేసి క్రూరంగా హింసించారు. ఆ వృద్ధుడు ఎంత వేడుకున్నా వినకుండా, ఒక బాటిల్లో ఉన్న మూత్రాన్ని ఆయనతో బలవంతంగా తాగించారు. ఈ దారుణాన్ని నిందితులు తమ మొబైల్ ఫోన్లలో వీడియో తీసి సోషల్ మీడియాలో షేర్ చేయడంతో ఈ విషయం బయటపడింది. బాధితుడు బిహారీ బంజారా ఎలాగోలా వారి బారి నుంచి తప్పించుకుని పోలీసులను ఆశ్రయించారు. తనపై జరిగిన దాడిని, అవమానాన్ని వివరించారు. బాధితుడి ఫిర్యాదు మేరకు పోలీసులు కేసు నమోదు చేశారు.
