కలం, మిర్యాలగూడ: చింతలపాలెం గ్రామానికి చెందిన ప్రముఖ పురోహితుడు, బ్రహ్మ శ్రీ దత్తాత్రేయ శర్మ అకాల మరణాన్ని నిరసిస్తూ మిర్యాలగూడ పట్టణంలో బ్రాహ్మణ సంఘాల నాయకులు, పురోహితులు (Brahmin Association) గురువారం భారీ నిరసన ర్యాలీ నిర్వహించారు. దత్తాత్రేయ శర్మ ఆకస్మిక మృతి పట్ల తీవ్ర ఆవేదన వ్యక్తం చేసిన పురోహితులు, ఆయన ఆత్మకు శాంతి చేకూరాలని కోరుతూ సంతాపం తెలిపారు.
ఈ సందర్భంగా బ్రాహ్మణ సంఘాల ప్రతినిధులు మాట్లాడుతూ.. సమాజంలో ఆధ్యాత్మిక మార్గాన్ని చూపే పురోహితుల పట్ల దురుసు ప్రవర్తన, వేధింపులు రోజురోజుకూ పెరుగుతున్నాయని ఆందోళన వ్యక్తం చేశారు. సమాజంలో బ్రాహ్మణులకు తగిన గౌరవం కల్పించాలని, వారిపై జరుగుతున్న దాష్టీకాలను, దురుసు ప్రవర్తనను ప్రభుత్వం వెంటనే అరికట్టాలని వారు గట్టిగా డిమాండ్ చేశారు. నిరసనలో భాగంగా బ్రాహ్మణ సంఘాల ప్రతినిధులు కీలక ప్రకటన చేశారు.
పురోహితుల భద్రత, గౌరవం కోసం మిర్యాలగూడ పట్టణ పరిధిలోని అన్ని దేవాలయాలతో పాటు గణపతి మండపాల్లో సైతం పూజలను నిలిపివేస్తున్నట్లు స్పష్టం చేశారు. బ్రాహ్మణుల సమస్యలపై ప్రభుత్వం తక్షణమే ప్రత్యేక దృష్టి సారించి, తగిన న్యాయం చేయాలని వారు విజ్ఞప్తి చేశారు. ఈ నిరసన ర్యాలీలో మిర్యాలగూడ ప్రాంతానికి చెందిన వివిధ బ్రాహ్మణ సంఘాల పెద్దలు, దేవాలయాల అర్చకులు, పెద్ద సంఖ్యలో పురోహితులు పాల్గొని తమ నిరసనను తెలిపారు.
వినాయక విగ్రహ ఏర్పాటులో ఘర్షణలో పూజారి మృతి
నాగార్జునసాగర్ నియోజకవర్గం తిరుమలగిరి సాగర్ మండలం పరిధిలో వినాయక విగ్రహ ఏర్పాటులో భాగంగా ఇరు వర్గాల ఘర్షణలో పూజా కార్యక్రమం చేయడానికి వచ్చిన పూజారి మృతి చెందిన సంఘటన సోమవారం జరిగింది. వివరాల్లోకి వెళితే.. తిరుమలగిరి సాగర్ మండలంలోని చింతలపాలెంలో వినాయక చవితి సందర్భంగా గ్రామంలో పలుచోట్ల వినాయక విగ్రహాలను ఏర్పాటు చేశారు. మొదటిరోజు ప్రారంభ పూజా కార్యక్రమానికి నాగార్జునసాగర్ కు చెందిన దత్తాత్రేయ శాస్త్రి (దత్తు అయ్యగారు) హాజరయ్యారు. గ్రామంలో మొదట మాది అంటే మా విగ్రహం వద్ద పూజ నిర్వహించాలని ఇరువర్గాల వారు పూజారితో ఘర్షణకు దిగారు.
ఈ తోపులాటలో పూజారి కింద పడగ తల వెనుక భాగంలో తీవ్రంగా గాయమైంది. దీంతో అపస్మారక స్థితిలోకి వెళ్లిన దత్తాత్రేయశాస్త్రి అక్కడికక్కడే మృతి చెందాడు. అనంతరం మృతదేహాన్ని పైలాల్ కాలనిలోని అతని నివాసానికి, అనంతరం సాగర్ ఆస్పత్రికి పోస్టుమార్టం నిమిత్తం తరలించారు. తిరుమలగిరి సాగర్ పోలీసులు కేసు నమోదు చేసుకుని దర్యాప్తు చేస్తున్నారు. దత్తాత్రేయ శాస్త్రి వినాయక చవితి నాడు మృతి చెందడంతో సాగర్ పైలాన్ కాలనీలో విషాద వాతావరణం చోటుచేసుకుంది. ఆయన మృతికి కారణమైన వారిని కఠినంగా శిక్షించాలని బ్రాహ్మణ సేవా సంఘం ఆధ్వర్యంలో నిరసన తెలుపుతూ ర్యాలీ చేపట్టారు.
