కలం, స్పోర్ట్స్: పోర్చుగల్ ఫుట్బాల్ (Portugal Football) లో అనూహ్య పరిణామం చోటుచేసుకుంది. కెప్టెన్ క్రిస్టియానో రొనాల్డో (Cristiano Ronaldo) జాతీయ జట్టు శిక్షణ శిబిరం నుంచి వెళ్లిపోయాడు. కోచ్ జార్జ్ జీసస్‌తో విభేదాల నేపథ్యంలో ఈ నిర్ణయం తీసుకున్నట్లు తెలుస్తోంది. కోచ్ మీడియా సమావేశం తర్వాత, పోర్చుగీస్ ఫుట్బాల్ సమాఖ్య అధ్యక్షుడు పెద్రో ప్రోయెన్సాతో మాట్లాడిన అనంతరం క్యాంప్‌ నుంచి వెళ్లినట్లు రొనాల్డో సోషల్ మీడియాలో వెల్లడించాడు. వివాదానికి నార్వేతో జరిగిన మ్యాచ్‌ నుంచే బీజం పడింది.
ఆ మ్యాచ్‌లో రొనాల్డో బెంచ్‌కే పరిమితమయ్యాడు. జట్టు 2-1తో గెలిచినా.. రొనాల్డోకు మైదానంలోకి దిగే అవకాశం రాలేదు. దీంతో అతను అసంతృప్తికి గురైనట్లు వార్తలు వచ్చాయి. ఆ తర్వాత రొనాల్డో జట్టు సాధారణ శిక్షణకు దూరంగా ఉన్నాడు. ఈ వ్యవహారంపై జీసస్ మాత్రం రొనాల్డో శిక్షణకు నిరాకరించలేదని చెప్పాడు. జట్టు ఎంపిక విషయంలో తుది నిర్ణయం తనదేనని స్పష్టం చేశాడు. డెన్మార్క్‌తో జరగనున్న మ్యాచ్‌లో రొనాల్డోను ఆడించకపోవచ్చని కూడా వెల్లడించాడు.
ఈ పరిణామాల మధ్య సమాఖ్య అధ్యక్షుడు పెద్రో ప్రోయెన్సా కూడా రొనాల్డో, జీసస్‌తో మాట్లాడాడు. సమస్యను పరిష్కరించేందుకు చర్చలు జరిగినప్పటికీ.. ఆ తర్వాత రొనాల్డో క్యాంప్‌ నుంచి వెళ్లిపోయాడు. క్యాంప్‌ నుంచి వెళ్లిన విషయాన్ని రొనాల్డో స్వయంగా ప్రకటించాడు. తన నిర్ణయానికి గల కారణాలను సరైన సమయంలో పోర్చుగల్ ప్రజలకు వివరిస్తానని చెప్పాడు. ప్రస్తుతం పోర్చుగల్ జట్టు రొనాల్డో లేకుండానే తదుపరి మ్యాచ్‌కు సిద్ధమవుతోంది.
