కలం, వెబ్ డెస్క్: తెలంగాణ కరువు పరిస్థితులపై ఢిల్లీకి సీఎం రేవంత్ (CM Revanth Reddy), మంత్రి ఉత్తమ్ కుమార్, ఉన్నతాధికారులు పయనమయ్యారు. ఆదివారం ప్రధాని మోదీ, కేంద్రమంత్రులను రాష్ట్రానికి కరువు సాయం ఇవ్వాలని కోరనున్నారు. కరువు పరిస్థితులు రైతులను ఆందోళనకు గురిచేయడంతో రాష్ట్రాన్ని ఆదుకోవాలని కేంద్రానికి విన్నవించనున్నారు. వర్షాభావ పరిస్థితులు, భూగర్భ జలాల కొరత, సాగునీటి సమస్యలతో వ్యవసాయ రంగం ఎదుర్కొంటున్న ఇబ్బందులను సీఎం వివరించనున్నారు.
కేంద్రంతో జరిగే సమావేశంలో తెలంగాణకు ఆర్థిక సహాయం అందించాలని ముఖ్యమంత్రి రేవంత్ రెడ్డి కోరనున్నారు. కరువు ప్రాంతాల్లో (Telangana Drought) రైతులకు ఉపశమనం, అన్నదాతలను ఆదుకోవడం, గ్రామీణ ప్రాంతాల్లో ఉపాధి అవకాశాల పెంపు వంటి అంశాలను కేంద్రంతో చర్చించనున్నారు. ఇప్పటికే కరువు పరిస్థితులను అంచనా వేసిన రాష్ట్ర ప్రభుత్వం.. కేంద్రానికి ప్రత్యేక ఆర్థిక ప్యాకేజీ కోసం ప్రతిపాదనలు పంపించింది. పంట నష్టాలు, కరువు పరిస్థితులను ఎదుర్కొనేందుకు ఆర్థిక సహాయంతో పాటు కొన్ని నిబంధనల్లో సడలింపులు ఇవ్వాలని నివేదించింది. హైదరాబాద్‌లో ఖేలో ఇండియా క్రీడా పోటీలు డిసెంబరు 11 నుంచి 22 వరకు నిర్వహించనున్నారు. ఈ నేపథ్యంలో పోటీలకు ప్రధాని మోదీని సీఎం ఆహ్వానించే అవకాశముంది.
ఎల్ నినో ప్రభావం దృష్ట్యా తెలంగాణలో ఈ ఏడాది వర్షపాతం సాధారణం కంటే తక్కువగా నమోదైనట్లు వాతావరణ శాఖ అధికారులు వెల్లడించారు. ఇప్పటికే రాష్ట్ర ప్రభుత్వం 31 జిల్లాల్లోని 365 మండలాలను కరువు ప్రభావిత ప్రాంతాలుగా ప్రకటించింది. వీటిలో 111 మండలాల్లో తీవ్ర కరువు, 254 మండలాల్లో సాధారణ కరువు పరిస్థితులు ఉన్నట్లు స్పష్టం చేసింది. 2026 జూన్ 1 నుంచి సెప్టెంబర్ 30 వరకు రాష్ట్రంలో సాధారణంగా 740.6 మిల్లీమీటర్ల వర్షపాతం నమోదు కావాల్సి ఉండగా.. 615.5 మిల్లీమీటర్లు మాత్రమే నమోదైంది.
